Foto: Majorie Nijbroek

Fratsen Marcel Stroet: De zotten

  Cultuur

Noe in disse carnavalstied wurdt wal eens e zeg: de zotten viert feest. Moar ze doot dat bewust en in een bepaalde tied van `t joar. Ze verkleedt zich dan en goat zich efkes te boeten an drank en wors. Ne fikse polonaise kump der op gang en `t verkleden is ieder joar `n gemas op zich. Bepaalde leu griept ieder joar den boerenkiel en kloar bunt ze. Anderen streupt de carnavalswinkels of noar iets origineels.

Ik mos zo denken an de zotten toen ik het gedoo las oaver de stroomrekening. Den was neet good oet erekkend en en wij mot allemoale zowat 300 euro mear betalen as begroot. Ie zollen ze toch `t zottenkabinet neumen, ears beloaven dat wij der allemoale op veuroet goat en noe dit wear. 'Hoe krieg ik oe geld in miene knippe-beleid' is het.

Prins Mark Rutte geet dan alles wear lieke proaten, want Wiebus den rare kwiebus is de weg al helemoale kwiet en zei: `t is noe eenmoal zo, moar volgend joar geet `t anders. Want at ze argens geld tekort komt, dan gooit ze `t op `t milieu. Milieuheffingen hier of doar. Moar de grootste vervuiler, `t vleegtuug, doar meuge wij neet ankommen. Doar wilt ze zelfs nog oetbreiden, doar kan toch gin mense wat van snappen?

Vrogger deden de leu oaveral altied `t lech oet of gingen zelfs al noar berre as `t donker werd. Zo woonden der bij ons in de buurte ok `n paar olde leukes, ze hadden ne zunne en leafden van wat ze hadden.

Ok de zunne kwam zelden van den brink of. In dee tied werd ieder hoes an e slotten op den stroom. Den olden buurman vond dat moar niks en ze hadden allenig moar ne lampe hangen in `t veurhoes. Wee oe gebeente as ie den andeden. An `t ende van `t joar kwam de stroomofrekkening en den olden buurman was in alle stoaten. De vrouwe en de jonge kreggen van alles te heuren, want `t was der helemoale biehen. Wie toch in vredesnaam iedere keare de lampe an en oet e doane had, want ze mossen 2 gulden betalen!

Meer berichten