Foto: Majorie Nijbroek

Wekke van de 'fizizjun ussistunt' - Fratsen Marcel Stroet

  Column

Noe zul ie goan denken 'Wekke van de Pa'? Vaderdag is toch allang e wes? Ja, dat klopt, moar PA steet veur physician assistant. As ie dat woord al kunt oetsprekken, zol al een wonder wean. De PA is een zorgverlener die medische taken overnemt van de medisch specialist. Hij/zij mag zelfstandig warken zolange dit onder indirecte supervisie van een medisch specialist is. Dus `t is eigenlijk `n dokter, moar ok wear neet. Ie sprekt `t oet as 'fizizjun ussistunt'.

Noadat ie dit oet e sprokken hebt kun ie der meteeen hen met `n gebrokken tonge. Eigenlijk is `t natuurlijk de assistent van den dokter, moar ok wear neet. Ze meugt oe noakijken net as de hoesarts en pillen veurschrieven doar woar ie las hebt. Umdat wij met zien allen steeds older wurdt, krig de dokter `t ok drokker en dan is een PA natuurlijk ideaal. Dus in de Wekke van de PA viert ze `n feestje met zien allen. Zo wurdt der van alles an e greppen um feestjes te vieren.

In Hoarle hebt ze PZF oftewal Papa`s Zuip festijn. Moar as ie de berichten heurt, meugt mooders ok kommen en as ie `n bewies van de dokter of de PA met brengt, kun ie eventueel ok `n radlertje kriegen zonder alcohol. Mooie feestjes zonder al te strakke regels. Het bestuur besteet oet acht man en ze bunt allemoale veurzitter.

Zo was ik vrogger ok eens op `n vergadering van de carnaval. Wij wazzen met zien zessen, de veurzitter was nogal `n kniepkontte en dronk `t leefste van `n ander. De earsten bestellen `n rondje en de rondjes gingen mooi van de riege of. As leste zol de veurzitter an de beurte wean. Noa vief biertjes kiek e wij verwachtingsvol noar de veurzitter of he de vinger op zol stekken. Iemand an toafel gooien zien glas al umme. Met andere weurde: kom op met dat bier! De veurzitter zoag dat en kik verschrikt op zien horloge.. 'Potdimme', zeg e, 'is `t al zo laate, ik mot neug noar hoes hen!'

Meer berichten