Foto: Majorie Nijbroek

Poeterig te passe - Column Marcel Stroet

  Column

De afgelopen wekken was ik `n betje poeterig te passe. Ie kent dat wal: luk zweiterig, snotterig en hoosten as `n nuchter kalf. Noe bun ik neet zo van de dokters, dus ik sukkelen der moar `n betje met vedan. Het werd neet better en dreien en massen in berre, derin deroet en zo vedan. Oetendelijk toch moar `n ofspraak e maakt bie de dokter. Noe bunt de tieden luk veranderd en is `t neet de bedoeling dat ie moar zo terechte loopt zo as vrogger bie Hendrik Grobbee. Ze vrogen mien 'Wat is oe hoesarts?' Ik zeg: 'Jaap Wolf.' Noe blik dat den al joaren geleden met pensioen is e goane en mien huidige hoesarts is mevrouw Schaap.

Ik denk dan blieve wij in ieder geval onder de dieren, moar ik mos mien melden bie mevrouw Drijfhout. Bie thoes was ik al in de warre en dan mot ie der nog hen. Mevrouw Drijfhout is een alleraardigste dame en den ging met dat hoarapparaat an `t luusteren. Het veel mien op dat `t ding neet mear zo kold an veulen as vrogger. Ze trok wal `n heel ernstig gezichte en zei: 'Der zit `n virus in oe longen, dus ie hebt `n longontstekking'.

Ik mos ne kuure ophalen bie de apotheek en met de wekke was ik al `n stuk better te passe. Bie de apotheek mos ik een nummer trekken en wochten op de beurte. Noas mien zat `n vrendelijk vrouwtje den hearlijk plat kon proaten. Met `t weggoan zei ze allervrendelijkst: 'Goodgoan'. En ik zeg: 'Met oe ok'. Toen kwam der `n heel`n dikken kearl binnen met `n klein vrouwke. Den kearl maken zien beklach oaver `t drankje wat he mos sloeken. He zeg teggen de medewarkster: 'Alle buren hebt `t al in de rugge, ie zolt mien toch wat anders motten doon'. De apotheker kik op `t etiket en las veur: 'Drankje veur Hendrik, 3x daags innemmen, good schudden veur gebroek'. 'Kiek', zeg Hendrik, 'ik kan gin mense mear vinden den mien wil schudden'.

Meer berichten