Foto: Majorie Nijbroek

Cowtoilet - Fratsen Marcel Stroet

  Column

Earst efkes een betje oetleg oaver de boerentaal. Een boer zal neet gauw zeggen: ik heb veertig koeien in de stal. Dee neumt he beeste. Weurumme wet ik ok neet precies, want een varken is ok een beest, moar den neumt ze dan wal wear bie de naam.

Noe blik dus dat dee beeste vulle stikstof oetscheit en dat is tegen `t zeare been van de politiek en andere leefhebbers um een ander de schold te geven en dat ie zelf de rugge schoone holdt. D66 geet der wal heel wiet in: deur alles vot te doon heb ie der ok gin las mear van.

Noe is der iemand oet Doetinchem den `t probleem van de oetstoot hef op e lost. De beeste mot noar `t toilet net as ie en ikke. Dissen man kump met de oetdrukking, woar ik persoonlijk `n alderbastende hekkel an heb: 'Ik denk neet in problemen, moar in oplossingen'. Ik heb al menig vergadering met e maakt woar dat soort leu zit. De hele oavond klieren oaver de meest wonderlijke ideeën, woar gin zak van terechte kump.

Moar dissen man is der wal met gengs e goane en hef `t ok oet probeart. Noa `t melken as de beeste in de boxen stoat kunt ze doar `n plasje doon en kriegt ze `n paar brokjes as beloning. De stikstof wurdt schienboar an e maakt as de pis met de poep wordt vermengd. De koo is `n gewoontedier dus dat zul ie hum an kunnen learen. Dus simpel en makkelijk: de boer`n mot investeren in toiletten.

Ik zee mien 's oavonds al bie `n boer op visite en zeg dat ik efkes oet de bokse mot. Kom ie bie de pot is e bezet, want Bertha 53 zit derop. Jonge kalver zult dan ok vast `n luier umme kriegen um earst zindelijk te wodden. Ok ik denk noe efkes in oplossingen: um de drokte tegen te goan bie festivals en feesten allemoale `n grote luier umme en der hoof gin mense mear noar de pot hen. Veurdeel te oaver: gin speulwaer mear neudig, gin aparte wcwagens mear neudig en ie kunt de ganse oavond op dezelfde plaatse blieven stoan.

Meer berichten