Foto: Majorie Nijbroek

Schearzeepe - Fratsen Marcel Stroet

  Column

Maxima is der e wes, bie de poepfabriek van Groot Zevert. Met grote letters stond `t in de krante: ok Maxima hef verstand van poep, want ze kump ok van den boer.

Moar of allenig moar boeren verstand hebt van mest dat vroag ik mien of. Ik zee Maxima nog neet met de witte klumpkes an oaver `t arf lopen um de varkens te verleggen. Ze zal vast van `n boerderieje kommen, moar of ze ok de hökke mos oetsmieten, ik wet `t neet. Beatrix zal dan ok vast an Willem hemmen e vroagt, hoevulle staldeuren ze hadden alveur zee toostemming gaf um der met te trouwen. Het antwoordt van Willem kan dan wean: ik zal der de volgende keare noar kieken as ik de beeste melk. Oetendelijk zult der wal genog deuren e wes wean, want ze bunt al joaren bie mekeare. Onlangs bunt ze verhuusd noar een ander optrekje en woont ze noe vrij roem. Dan kan `t soms gebeuren dat ie dinge kwiet bunt. Zo is Willem natuurlijk an zien board e kommen. Het blik dat he de schearzeepe argens hef near e zat, moar neet mear wet woar. Noe is ons koningshoes nogal zuunig en Willem zal earst ziene schearzeepe wear motten vinden um zich te schoeren. Dat is dus nog neet gebeurt, want he krig eets `n board. Leu met `n board; ie mot der van hollen en der bunt der ok dee den board prachtig biehold, moar der bunt der ok woar ie an den board kunt zeen wat veur soep ze veurige wekke e getten hebt. Zo zatten wij ok ne keare in `t cafe en de zunne van 'n koster was een tiedje in de stad e wes studeren. He kwam de kroeg binnen en earst kennen hum gin mense wear, moar too he goeiendag zei, kon ie an de stemme heuren dat he `t was. Ne groot`n kroeskop vol hoar `n een hoop pluuzerieje an de kinne. Een van de cafégangers sprok hum der op an: Goh zegge e, hebt ze in dee grote steaden gin kappers? Jazeker, zeg de kroeskop, moar ik mot nogal zuunig leaven anders kom ik neet rond. O zo, zeg de caféganger en he zei der achteran: moar waait `t ok neet in dee grote steaden? De kroeskop kik hum an en zeg: goh, doar heb ik nooit op e let, wattan? Noa, zeg den caféganger, dan goat effen met oe snoete in de wind stoan, dan kunt dee pluuze derof waaien. Dan lik `t nog wear een betje.

Meer berichten