Foto: Majorie Nijbroek

Fratsen - Marcel hef ne hoop vroagen

  Column

Heb ie dat ok wal eens, dat ie `t allemoale neet mear kunt volgen en denkt wat een gemas?

Disse wekke roop ik de hulp in van oeleu. Dus ieder den `n vroage good kan beantwoorden, krig van mien `n fratsentaartje. Mits ie gin flauwekul verkoopt, zoas ik regelmoatig doo.

Doar geet `t an. Wij mot van `t gas of en in Duutsland krieg ze juust subsidie at ze derop goat, hoe zit dat? Krieg wij deur `t gemas met al dee waterpompen gin verzakkingen in onze grond? Is `t neet gewoon better en op den duur goedkoper um allemoale `n airco te nemmen? De stroom kun ie zelf opwekken met zonnepanelen en een airco koelt in de zommer en verwarmt in de winter, toch? De Brexit, ok alwear een apart verhaal. Ze wollen ok al neet met doon an de euro en noe wilt ze deroet. Ok dat aparte links rieden doot de meesten doar nog. Is `t neet wiezer um dat land onder te loaten lopen of heurt ze der juust wal bie?

De Bielemennekes loopt met `n iepe veurop in de optocht in Beltrum. Woar kump dat vandan of mot ze de weg vrie sloan, zodat de muzikanten der deur kunt? In de gemeente Berkelland steet schienboar `n conservatorium. De burgemeister wet dat zelfs neet, moar `n professor uut Rotterdam wal. Wet ie woar dat is? Noe der mear electrische auto`s komt, lup de oaverheid `n hoop accijns mis, hoe denk ie dat ze dat oet onze knippe goat halen?

Is grondwater warkelijk goedkoper dan leidingwater? Bie grondwater heb ie `n pompe neudig den diesel of stroom neudig hef. Leu proat dan oaver eigen water, moar is dat wal zo?

Ik bun benieuwd noar wat oeleu der van bakt. Ie kunt oe mening sturen noar marcelstroet@outlook.com. Dat is een mailadres of gewoon bie de bakkerieje ofgeven is ok prima. De beste antwoorden zal ik dan oaver `n paar wekke met oeleu hier besprekken. Alvast bedankt veur de meuite.

Ik sprek oe.

Meer berichten