Foto: Majorie Nijbroek

Fratsen op tv - Column Marcel Stroet

  Column

Met de jammarkt hadd'n wij de eer dat der `n leuke dame kwam van Omroep Gelderland.

Wij hadden samen met de jamcommissie en de OVN een jamquiz bedach en dat was de dame op evollen en hef doar een item van e maakt veur op de telavisie. De halven dag was ze der en ik dach nog,`t zal wal een uur duur`n. 's Aovonds efkes kieken en joa heur in `t nieuws kwam `t veurbie. Ik geleuf toch wal de volle dree minuten. Het is natuurlijk altijd efkes schrikken as ie oe eigen heuft op telavisie zeet en veur jullie helemoal natuurlijk. Ok oe eigen stemme klunk anders dan verwocht.

De jammarkt, toch een prachtig iets dat der roem tiendoezend bezeukers langs de kreume hen schooft. De vrijwilligers bunt der onwies drok met en doar heb ik vulle waardearing veur. Belangeloos zurgt ze veur een perfecte organisatie en doar kan ons dorpke trots op wean.

Toen ik dus 's oavonds efkes `t stukske zag op de telavisie gaf dat veuraf nog een heel gemas. Wij hebt pas `n nieuw kastje e kreggen van den provider en doar zit mien een bult zenders op. Op zender 350 zat Omroep Gelderland. As ie alle zenders deur de wekke wilt bekieken kom ie neet mear in berre. Ik wet nog dat wij vrogger `n zwartwit telavisie hadden met van dee drukknoppe. As ie dat ding op een anderen zender wollen zetten maken dat een hels geloed. Al wattieds waren de knoppe kapot en dan werd de knop in e drukt met `n luciferpinneke. As de olde leu der bie zatten mos ie veurdat ie hum an zatten op de goeien zender hebben stoan, want mien va had der een gruwelijke hekkel dat wij an knoppe zatten.

Ne keare wol ik Floris kieken en ik zat hum van Nederland 1 noar 2. Tjonge, tjonge, dat heb ik e wetten. Mien va kik op van de krante en zeg: potverdimme, zit toch neet steeds op dee knoppe te drukken, `t is gin typmachine. Moar ja, een paar joar later was Floris te zeen in Turks Fruit en doarnoa mochten wij nooit mear noar Floris kieken, want dat was een smearkees.

Meer berichten