Foto: Majorie Nijbroek

Fratsen Marcel Stroet - Ontheuren

  Column

'Dat bunt mansleu met zwil in de hande, dee hebt vrouwleu met hoar op de tande.' Doar mos ik disse wekke an denken too der ne breef bie de krante zat met de titel: 'betaalbaar definitief ontharen'. In den anhef stond; nooit mear schearen, nooit mear stoppels. Ik dach: potdimme, dat is mooi wark, vot met de schearmeskes en vot met de schearzeepe.

Het lik mien te mooi um woar te wean. An de achterkante van den folder stond `n hele rits an behandelingen met de prieze derbie. Bovenlippe of kinne veur 19,95. Ik dach: bovenlippe, doar greuit bie mien gin heure of bedoelt ze hier boaven de boavenste lippe en tussen 't neusgat? De hele snoette kon ok. Moar ok de onder- of boavenbeene. Opvallend von ik ok dat de veute ontheurd konden worden. Ik heb nog nooit e zeene dat doar hoar opzat en at ze der al zit heel fientjes.

De schaamstreek wilt ze oe ok schearen en doar steet bie: alleenig veur vrouwleu. Vremd, want bie de kearls greuit doar ok hoar. Ik denk dat ze bange bunt dat ze doar goat schearen dat der wat anders geet greuien dan hoar. Kan dan moar zo wean dat ze met `t schearmes oetscheet en dat ie der ne jaap in heb zitten op 'n geveulig heukske.

Lest waren der twee bekenden van mien 'n avondje noar de sauna. Ze zatten doar lekker te zweiten in `t blote gat, kump der inens ne mooie frisse dearne binnen met alles derop en deran. Umdat `t al zo warm was wissen de kearls zich bienao gin road. Snel ging der `n handdook oaver de edele delen en de dearne begon vrendelijk te lachen. Noa een tiedje zeg één van de kearls: kom, zul wij der oet goan? Noa, zeg den ander, low nog efkes wachten tut de wind is goan liggen.

Meer berichten