Foto: Majorie Nijbroek

Fratsen Marcel Stroet: Emmer stront

  Column

Noe was ik van de wekke op `n vergadering oaver `t Beltrums ontbijt. Dit doot wij noe al een paar joar en der maakt der steeds mear gebroek van. Noa Noariks veurbeeld, wat doar ok altied prima geet. Ik persoonlijk bun gin vergaderkloas um `t moar eens netjes te zeggen. Endeloos drammen oaver dinge dee mot gebeuren is neet mien ding. As Pietje zeg, ik neum moar wat: 'Ik regel de bordjes', dan is `t kloar. Zo krieg ik altied hulp van `t mannenkoor um alles netjes te regelen. Wij begint natuurlijk met `n gebakje en `t oaverleg op zich duurt hoogoet een half uur.

Prima veur mekeare, hiernoa drink wij nog `n paar kolde biertjes en dan komt de starke verhalen los. Zo sprok mien der eene van `t koor an oaver miene stukskes en of ik neet eens wat oaver de burgemeister kon zeggen. Den man zeg: 'He hef der toch ne kroam van op ziene boerderieje'. Ik kiek hum verbaasd an en zeg: 'Ne kroam van?' Ik wet dat de burgemeister in Noarik woont, boetenaf en volgens mien hef he `t aardig glad um de poste. 'Nea', zeg e, 'neet in Noarik, moar in Veur-Beltrum. Ie wet wal dee boerderieje den de gemeente e koch hef um van `t gezeur of te wean, veur bienoa 1 miljoen euro. Dat geet ons nog vulle mear kosten as dee 1 miljoen.'

Ik zeg: 'Hoe kom ie doar dan bie?' He zeg: 'Noe blik dat der oaveral ok nog asbest op zit en de strontputten zit lieke vol. Den boer hef de ambtenaren dee bie de opleavering bunt e wes mooi te pakken e had.' Schienboar hef ne ambtenaar de opmarking e maakt dat de putten nog vol zatten, woarop den boer hef e zeg: 'Joa, dat klopt en ik wil ze met alle plezear leug halen, moar as de zietkante van de putte gin druk krig dan stort den heelen stal in mekeare.'

Het leughalen van de putten zol zon betje 50.000 euro goan kosten, moar dat kan volgens mien wal anders. Wij geeft iedere inwoner van Berkelland een leuge emmer met deksel en dan kun ie gratis tuinbemesting ophalen in Veur-Beltrum.

Meer berichten