Foto: Majorie Nijbroek

Fratsen Marcel Stroet 'Krom piepke'

  Column

22 Uur hebt ze vergaderd, de leiders van Europa. 22 Uur achter mekeare. Tjonge, jonge, jonge, doar hoof ie toch gin deskundige veur te wean um dan te wetten, dat der niks gin zinnigs mear oet kump?

Het ging oaver de belangerieke plekken in `t Europarlement. Ik probear mien dan veur te stellen hoe dat geet, want ieder strid natuurlijk veur zien eigen parochie; oaver de inhold goat ik `t neet hebben, want doar kan ik met de kop neet bie, moar ik zag de morgen dernoa wal hoe ze allemoale oet de kop kekken.

Het was net of ze met zien allen wearkwammen van een dag Zwarte Cross. Ik nem neet an dat ze vergaderd hebt onder `t genot van `n fleske bier, moar zo zogen ze der wal oet.

Het zal wal prima wean dat der één Europa is, moar ieder land hef toch zien eigen gemas. Zo mot wij hier van `t gas af en 100 meter wieter in Duutsland kriegt de leu subsidie as ze op `t gas goat. Noe wet ik neet of ie dee Duutsers wal helemoale vertrouwen kunt, want dee wet natuurlijk ok dat der bie ons in Groningen nog onwies vulle zit in de grond. Moar deur de narigheid van de leu dee doar huust, blif `t der zitten.

Noe zit Groningen stief an de Duutse grense en `t kan dan moar zo dat de Duutsers met `n krom piepke ons gas goat wegzoegen. Ok al onze auto`s mot temee op stroom goan rieden, moar dan blik wal dat de oaverheid onwies vulle belasting mis geet lopen. Dat is natuurlijk neet de bedoeling en dus begint ze noe te klieren oaver rekkening rieden en hogere energiebelasting met als toppunt op de rekkening een klimaatheffing. Dus hoe mear leu der electrisch goat rieden, hoe meer klimaatheffing. Straks hebt wij `n prachtig schoon milieu en et wij allenig moar sla mear.

Dut mien denken an de kleine stukske vleis die ie altied kriegt in mearsterrenrestaurants. Dat de ober dan kump vroagen: 'En hoe vond u de biefstuk?' Woarop ie dan zegt: 'Ik heb hum e vonden onder de sla!'

Meer berichten