Foto: Majorie Nijbroek

Column Marcel Stroet: 'Vrogger kon het ok vernemsig heite worden in de zommer'

  Column

Tjonge, tjonge, as `t dan heet wordt boeten, dan zulle wij `t ok wetten. Meteen geet `t te wiet. Het verschil met vrogger is dat der noe allerlei deskundigen bunt dee doar dan een mening oaver hebt.

Neum ze moar op; klimaatverandering, tevulle an oetstoot van `t een of ander, opwarming, smeltende ieskappen en wat al neet.

Ik wet wal dat `t vrogger ok vernemsig heite kon worden in de zommer, moar umdat doar minder oaver e proat werd, was `t half zo slim. Een oetdrukking as: de muske valt van `t dak is toch van vrogger tied.

Ik wet nog dat ik `n keare hen hooischudden mos in `t Kooibos. De zunne branden der good op los en ik met de kale hoed op den trekker zonder kappe. Kearl wat heb ik 's oavonds een las e had, niks was ik mear weard, ik kreg der zelfs kolde rillingen bie.

Het was natuurlijk `n zuuvere zonnestek en mien moo gooide `n melkbusse karnemelk in bad en doar mos ik inkroepen.

Het werd inderdoad wat better, moar sloapen heb ik den nach neet vulle e doane. Ne wekke later kon ie de repen vel zo van mien of trekken.

In dee tied kreg ik ok net `n betje de board in de keal en ik wet nog dat een eume mien zo ankik en zeg: 'Potdimme jonge, ik heb nog nooit e zeene dat as der eene volgreuid is, he dan ok compleet nieuw vel krig'. 's Oavonds ging ik oet en de eume rearn mien nog noa: 'Noe ie bie de groot`n heurt, goat ie ok met scharp scheten, dus hol `t spul in de bokse'.

Ne buurjonge den `t ok heurde, lachen zich zowat van de sukke. Negen moand later wol he dat he `t advies had op e volgt.

Meer berichten