Foto: Majorie Nijbroek

Marcel Stroet over het 'schorriemorrievolk' van supermarkten

  Column

Schorriemorrievolk, dat bunt `t dee oetbaters van supermarkten. As wij as kleine man iets ophangt an de gemeentepeale stoat binnen vief minuten de boa`s bie ons an de veurdeure.

Moar as dee grote supermarkten dat doot, dan kiekt ze de andere kante op. Noe is der in Neede ne Jumbo los e goane en ieder mos en zol `t wetten. An iederen lechpoal en verkearspoal was wal een bordje e plaatst. Ok met pijlen derop, woar ze wal neet zit. Ik zag 's oavonds al een paar man de bordjes umme dreien met de pijlen de andere kante oet.

Noe kon AH natuurlijk neet achterblieven en dee heb kriskras deur Neede hen allemoale fietsen e plaatst. Heel vremd natuurlijk, want ze bunt neet um te gebroeken, zo te zeene an den dikken ketting woaran ze vaste zit. AH had `t der moar drok met, want an al dee fietsen hing een dag later ne rare geale tasse van de concurrent.

Supermarkten probeart ons ok altied van alles wies te maken. As der eardappel in de reclame bunt, dan proat ze net of ze ze 's margens zelf heb e stokken. Ok de melk heb ze veurdat de winkel losgeet nog oet de koo e trokken, liekt `t wal.

As ze verkeard en tevulle hebt in e koch, dan kump der een sticker op te stoan: 'jammer um weg te gooien' en neet van: 'oei, wij hebt ons e had, nem `t moar gratis met'. Helaas goat deur dat geschorriemorrie vulle echte ambachtsbedrieve dichte. Liebrandt in Borculo zei `t al in de krante dat dat `t grootste probleem was. Deur dit alles loopt de winkelstroaten helaas leug.

Het zol toch jammer wean dat ie neet efkes kunt bieproaten in een ambachtelijke winkel woar ze oe nog kent en wet hoe `t met oe geet? Of kies ie der ok veur um as iemand met ne koare rond te loop`n en dan te scannen zonder dat ie een woord e wisselt hebt? Efkes gemeudelijk lallen met mekeare dat dut `n mense good.

Meer berichten