Foto: Majorie Nijbroek

Fratsen Marcel Stroet: Code nog wat

  Column

Tjonge, jonge, jonge, wat een eeuwig gedoo oaver `t wear. Uren van te veurten wordt der allerlei onwieze wear veurspeld en allerlei dinge of e last umdat der zogenaamd wat bunt dee met de weargoden kunt proaten. Dee van `t Journaal vin ik al helemoale kunstemakers. Ze kunt `t vertellen of ze `t zelf geleuft. Ze woagt soms zelfs de tied der bie te zeggen. Toch wal biezonder dat ie geld kunt verdeenen met iets wat ie neet in de hand hebt.

Zo geet dat ok met `t klimaatvolk. Wij mossen allemoale gootjes in de tuin greaven um de wateroverlast op te kunnen vangen. Noe is `t noa veurig joar nog steeds luk te dreuge en heur ie der verdacht weinig mear oaver. Afgelopen wekke werden der enkele wandelveerdaagsen af e last, umdat iemand oaver de radio rearn dat `t code oranje zol worden. Ik zat efkes boeten in den tuinstool um te wochten wat kommen ging. Het is good dat ik deroaver noar berre bun e goane, anders had ik der noe nog e zetten.

An de andere kante is `t moar good dat de wearpreutjesmakers gin geliek kriegt, anders waren de daake allange van onze huuze e weit. Moar veural dat gemas oaver de codes is wal zonne rare bedoeling. Code Greun is: niks an de hand, Code Geal is: pas op, der is meugelijk kans op raar wear. Code Oranje: der is grote kans op raar wear. Code Rood: heel vulle kans op extreem raar wear, dus met zien allen de kelder in.

Wat hebt de leu vrogger wat e mist, toen de codes nog neet bestonden. Ik wet nog dat ik in mien verkearingstied an `t wekke brekken was, toen `t in de wieten begon te luchten en donderen. Mooder, den allange in berre was, stond inens in de deurgang en sprenkelen met een tekske wijwater in `t rond. Umdat ik nogal kort bie de deure zat, kreg ik de volle loage oaver mien hen. Ik kennen het gebroek neet en schrok mien `n ongeluk en sprak `n klein vleukske oet.

Woarop mooder mien nog ne keare besprenkelen met de weurde: ie haalt `t ongeluk nog in hoes. As alle kamers besprenkeld wazzen, was `t hoes wear onwearsbestendig. Dus wij kunt der nog een code bie doon: Code Pears um inslag te veurkommen.

Meer berichten