Foto: Majorie Nijbroek

Fratsen Marcel Stroet - Van dik hout

  Column

Ik sprak van de wekke `n bekende en ze wol met alle geweld noar de karmisse in de Hoeve, want doar kwam Van Dik Hout. Ik zeg van dik holt? Nea, zegt ze, Van Dik Hout, de bekende Nederlandse band met liedjes as Het is zo stille in mien en Mien holten hart. Ik zeg: ie goat moar, `t lik mien niks.

Een dag of wat later vroog ik heur hoe `t was e wes. Noa, zeg ze, ik vond `t nogal tegenvallen: keiharde muziek en den zanger kon de hooge toon'n neet haal`n. As he `n betje hoger mos zingen, dreien he de microfoon noar `t publiek hen en dee begonnen dan te rearn as gekken. Dus al met al `n teleurstelling. Ik zeg: zo, dan kun ie van dat dik holt misschien better planken zagen?

Woordgrapje werd neet leuk e vonden. Moar dee mien wal wear denken an `t gemas oaver de beume in Reurle. Allerlei deskundigen goat zich der met bemeuien. Die beume doar hebt nog nooit zovulle bekieks e had as noe.

Misschien dat dee leu dee met beume kunt proaten der ok eens hen mot um te heuren wat de beume zelf wilt. Noe hebt der zelfs wat bedach um de beume te goan verpotten. Noa ik wet neet of ie de beume e zeene hebt, moar umme zulke joekels te verzetten mot ie heel wat wetten.

Vrogger hadden de leu vulle wieze proat. Zo werd der bie ons in de buurte `n old menneke verhuusd noar `t bejaardentehoes. Den man kwam nooit van den brink of en woonde der al mear as tachtig joar. Opa kreg `n mooie kamer in `t bejaardentehoes, moar was kats van streek. Met een moand of wat werd opa steeds slechter te passe en overleed. Een noaber kwam `t dreuvige bericht melden en he beslot zien verhaal met: ik heb `t altied al e zeg, olde beume mot ie neet verpotten.

Meer berichten