Foto: Majorie Nijbroek

Fratsen Marcel Stroet: Geneugelijkheid

  Column

Veur een paar daage terugge mocht ik efkes opdraven in het appartementencomplex an de Bartelinksgang in Eibargen. Ik zol het anderhalf uur hemmen oaver de bakkerieje en natuurlijk disse wekelijkse fratsen. Het was een zear geneugelijk publiek. De meesten wazzen al luk op leaftied, moar ze waren allemoale good te passe.

Toen ik binnenkwam zatten der al een paar hearlijk onderoet te genieten van mien kloarzet gemas. Veurzitter Henk heelp mien duftig met, moar was hoaste te enthousiast. He heelp mien met `t oetladen van de bonbons en met `t noar binnen hen lopen struukelden Henk oaver den drempel en joa heur: de bonbons vloog`n alle kanten oet. Een paar vrouwleu kroppen der op de kneene bie um ze wear in de deuze te doon.

Ik zeg zo: zet dee moar apart, dee kunne wij neet mear gebroeken. Woarop de vrouwleu opkiekt en zegt: ach bakker, wij bunt neet zo knutterig, ie kunt hier jo van de vloere etten.

Toch mooi, bedach ik mien ondertied, dat der zulk soort clubhuuze bunt veur de olderen. Meestal bun ik noa anderhalf uur wal oet e proat, moar noe was `t luk langer. Het veulden net of wij bie mekeare op visite wazzen.

Zelfs Annie den oaver de drankjes ging, was vergetten um mien dat te zeggen, dus op `t preuven noa was `t kale jach. Ik denk dat ze dat noatied wal in e haalt hebt.

Ik kreg `t ok oaver eenzaamheid dat nogal eens veurkump bie olderen, moar dat werd af e doane met: 'dat is hier neet an de hand, wij drinkt zowat dagelijks koffie met mekeare of anders goat wij sjoelen of biljarten'. Hearlijk geneugelijk bie mekeare in disse jachtige tied. Gin mense had de mobiel veur zich liggen en toen ik wol beginnen oaver bloggen en vloggen kekken ze mien an, asof ze zeggen wollen van dee stoete heb ik nog nooit e heurt.

Gin gemas op Facebook of wat dan, ok moar gewoon live met mekeare schik hemmen.

Van mien meugt jullie allemoale 110 worden!

Meer berichten