Foto: Majorie Nijbroek

Fratsen Marcel Stroet: Douche op de pot

  Column

Der wurdt steeds mear nieuwe fratsen bedach. Noe las ik vergangen wekke dat de nieuwste rage een douche-wc is. Noa de grote boodschap oe konte schoone loaten spuiten met water in plaats van ofveagen met `n olde krante. In Japan en andere Aziatische landen doot ze dat al joaren.

Noe bun ik der dan ok achter weurumme dat dee allemoale spleetogen hebt. Stel oe veur dat `t streulke water in oe voore te heet is, dan goa ie vaste kieken as een Japanner. In zo'n douche-wc zit een oetschoefboar sproeiertje, dat een warm streulke water tegen de konte an spuit.

Noe wil ik neet oaverdrieven, moar dat mag toch wal `n kleine hogedrukspuite wean um dat good schoone te spuiten. Ok wet ik dat as wij thoes de warme kraane anzet der altied earst luk kold kump veurdat `t warm wurdt. Ik zee mien al zitten op de pot dat ie inens ne kolde stroale water tegen de konte an kriegt. Ie zult van schrik opspringen en as ie oe dan umme dreit, krieg de warme stroale in de snoete.

Bie de luxere versies zit der zelfs nog een föhn op den oe `t gat mooi dreuge mek. En dat alles met `n paar drukjes op een knop, dus ie blieft an `t drukken.

Earder had ie altied `n pot zodat ie noatied nog efkes konden kieken hoe `t der bie lag. Tegenwoordig valt de boel al meteen `n ende vot in `t kolde water. Soms wil dan dat kolde water wal eens opspuiten, wat neet plezearig is.

Noe was der ne keare ne loodgieter bie ons en den zei: ie mot, veurdat ie goat zitten, earst `n velleke papier op `t water leggen, dan heb ie den las neet mear. Het schut mien elke kear te binnen as ik de konte wear nat krieg, dus te laate.

Ne keare was mien breur noar de pot hen e wes en had vergetten deur te speulen. Toen ik efkes later mos rear`n ik: 'Potdimme, viezen soppert, ie hebt neet deur e speult.' Woarop he zeg: 'Joa, dat wet ik, ik had der zonne mooien strakken van. Doar wol ik anderen ok van loaten genieten. Bah, bah, bah!'

Meer berichten