Foto: Majorie Nijbroek

Fratsen Marcel Stroet - Stille wean

  Column

Zelfs met dodenherdenking mossen der nog wat de kleppe los doon onder `t twee minuten stille wean.

Gelukkig zatten ze al vaste. Ik sprok van de wekke `n older menneke den altied nog wal gearne zeg, as der iets neet in den hoak is, 'ie hadden de oorlog eens met motten maken'. He was der nog fiks kwoad oaver dat der wat bunt dee deur de stilte hen mot schreeuwen. Volgens hum mossen ze dee patjakkers met `n ende holt oaver de hoed hen sloan. 'Derbie', zeg he, 'stille wean, dat kent de leu neet mear'.

Ik wet ok nog wal dat wij bie thoes en op schoole earder de kleppe wal dichte heel`n, want veur ie `t wist had ie `n meppert te pakken. Um half 1 was der onder `t etten `t nieuws veur land- en tuinbouw en o wee as ie wat woagden te zeggen. Ok op schoole was `t heel gewoon dat ie van tied tut tied efkes um de oarne slaag`n werd. Ik wil neet zeggen dat dat good is, moar ie wissen wal dat ie de kleppe mossen hollen.

Noe bunt der ok van dee geile hesjes in ons land actief. Rutte had ze netjes op de koffie e vroagt en dan bunt der een paar bie dee hum de hand neet wilt geven. Eigenlijk had Rutte dee meteen een klap um de oarne motten geven of in ieder geval neet binnen motten loaten.

Ok al heb ie nog zon hekkel an mekeare `n betje fatsoen mot der toch wean? Der was der zelfs eene bie den met de telefoon an de kop binnenkwam. Respect is dan wiet te zeuken. Het olde menneke zol zeggen: 'Duudelijk volk wat de oorlog neet met e maakt hef'.

Ik wil neet zeggen dat dee geile hesjes oaveral ongeliek in hebt, moar deur zo'n optreden verlees ie wal oe anzeen. Het olde menneke bromde zo nog efkes vedan en plots zei he: 'Kom wij goat `n biertje drinken'. Onder `t biertje drinken vertelde he dat vrogger `t bier in holten kratten zat en `t mooiste was dat as de heard neet good branden ze duftig an `t drinken gingen um de holten kratten te kunnen verstokkern.

Meer berichten