Foto: Majorie Nijbroek

Fratsen Marcel Stroet: Genieten

  Column

Hearlijk toch, dee wedstrijden van Ajax? Lekker onderoet met `n biertje en `n breudje genieten van voetbal. Gewone kearls zonder plakplaatjes of rare kapsels dee deran goat. Niks gin poespas, moar lekker met vulle inzet voetballen, zoas `t heurt. Helaas stoat de zekke met geld al veur ze kloar en veur wij `t wet voetbalt ze in `t boetenland.

Ok deur disse jongs is `t geleuf in `t Nederlands elftal wear e stegen. Noe moar hoppen dat ze deurzet en zich neet de kop gek loat maken. Ok plaatselijk geet `t steeds better, Neede kump endelijk wear `n klasse hoger oet noar ik an nem, Vios zal der wal inblieven en de rest dut ok lekker met.

Ok boeten `t voetbal umme is der natuurlijk van alles te genieten as ie good kiekt. De soap um de beume langs de weg geet nog vedan. Dus loat wij van de beume genieten, zolang `t nog kan. Het is natuurlijk wal zo dat as ie alle beume dale zaagt, ie ok gin las mear hebt van de processierupsen en wat ducht oe van de buxusrupsen? As ie dee kapot spuit dan goat de koolmezen deran, dus ok moar vot met de buxus. Ok in de dennen zit al een bepaalde rupse, den ok vreselijk kan jukken, dus ok moar vot met de dennen. In coniferen zit vulle muggen, doar wordt wij ok neet blie van, dus ok moar vot dermet.

Zo krieg een mooi glad landschap met gladionische oetzichten. 'Gladionisch' is een duur woord veur een land zonder beume. Het grote veurdeel is dan dat ie vanoet oe achtertuin zo de Johan Cruijff Arena in kunt kieken en kunt genieten vanoet oe eigen tuinstool van prachtig voetbal.

Meer berichten