Foto: Majorie Nijbroek

Fratsen Marcel Stroet: Escortbedrief

  Column

Wij in Neede hebt `t noe helemoale veur mekeare. Met grote letters werd der an e kondigt: nieuw escortbedrief in Neede. Ik dach: ik rie in een olden Renault, wat mot ik dan met een Escort?

Toen ik wieter las, zag ik wal dat `t gin goodkoop bedrief was en de monteurs bunt allemoale vrouwleu. Het uurtarief loog der ok neet umme: kon wal oplopen tot dreehonderd euro per uur. As ie zonne Escort de hele nacht wilt gebroeken, kan dat wal tot dreedoezend euro oplopen.

Tjonge, jonge, dacht ik, wat een duur bedrief. Ik heb toentertied mien auto e koch veur 1000 euro en den hef heel wat joaren e lopen.

Wieterop in `t verhaal zoog ik dat ik met mien boerenverstand het wear helemoale mis had. Het ging neet oaver auto`s, moar oaver vrouwleu. Wat `n spul is `t toch. Ie kunt der dan hen bellen en dan kun ie een dearntje huren veur een wilde nacht.

De gemeente hef der vergunning veur verleend, Joa, doarveur bunt ze wal te vinden, want wie wet kriegt hun dan wal korting? Het zal ok natuurlijk wal een veurdeel wean dat heur partner roadslid is.

Dan meugt hun misschien wal veur hondervieftig euro den sik verzetten. Het roadslid schrif zelfs op zien Facebook dat hij `t spannend vind als een malle.

Hij steunt zien vrouwe deur dik en dun met een dikke vinger noar angst en haat.

Ik heb natuurlijk ok efkes op de website e kekken. Doarop steet ondermear dat `t de wens van iedere man en zelfs ok vrouw een trio is. Dus met dree teglieke, ie zollen joh hande en veute tekort kommen um in een uurtje alle onderdelen noa te motten kieken.

Ik hol `t moar bie mien eigen garagebedrief. Vertrouwd en good. Mien Renaultje kan nog joaren met.

Meer berichten