Foto: Majorie Nijbroek

Fratsen Marcel Stroet - Plussenbeleid

  Column

Noe zul ie denken, woar geet dit oaver? Plussenbeleid? Joa, weurumme zul ie makkelijk doon as `t moeilijker kan. Plussenbeleid geat oaver de intensive veehouderij en dan met name oaver de ontwikkelingskansen van veeholders met vulle vee.

Het principe van `t plussenbeleid is um rendement en verbettering van `t dierenwelzijn en de volksgezondheid. Wieze woorden bunt dat, dee de gemeente en de provincie gebroekt veur `t boer wean. De boeren mot dan investearen in de stal zodat `t minder geet stinken en der minder oaverlast is van geloed. Ok mot zo'n boer in gesprek met umwonenden um samen te kieken dat ze zo min meugelijk las van mekeare hebt.

Moar dan wal zonder dat doar verplichtingen an zit. Typische politieke preutjes. Eigenlijk mot ie dit, moar as ie dat doot is `t ok good.

Stel oe veur as de buren bie de boer komp en zeg: wij vindt toch wal dat oe varkens luk roekt. Dan zal de boer zeggen; ach wat lastig, ik zal de staldeure dichte hollen. Het helpt natuurlijk gin zak, moar `t klinkt wal mooi.

Tegenweurdig mag ie de mest of aale neet mear rondsproeien met de aalekoare, moar mot alles injecteard worden. Ik wet nog dat vrogger toen de aaletonne nog volop in gebroek was, der boeren waren dee neet zo bes met mekeare konden, dan zoaterdagoavond zo dicht meugelijk bie `n ander veurthoes efkes gingen aale veuren.

Ie zatten dan hearlijk de ganze zundag in de aale loch. Ne wekke derop dee den anderen dan `t zelfde bie oe.

Ne keare belde de buurman zoaterdagoavond op dat he de putte vol had zitten van de wc. He had zelf gin tonne of wij efkes konden kommen. Wij der hen en de slange in de putte en toen de putte leug was werd der e vroagt woar wij het hen mossen brengen. Noa, zeg de buurman, loat `t moar in de bekke loop`n, want dat zoere spul wil ik neet op mien land hemm'n.

Meer berichten