Foto: Majorie Nijbroek

Fratsen Marcel Stroet: Vleis van vegetarische beeste

  Column

De geitenwollensukkeleu hebt noe de pik e kreggen op vleis.

In de wekke van 11 meart meug ie volgens hun zelfs `n hele wekke gin vleis etten. Dat is dan veural good veur 't milieu. Ie bespoart in zonne wekke volgens hun 130 liter water en 76 kilometer autorieden. De 130 liter water is wat neudig is veur 'n stukske vleis, dat der veur vleisvervangers ook völ water neudig is, is schienboar gin probleem. 76 kilometer autorieden bepoar ie as ie ne wekke gin vleis et. Onzinnig natuurlijk, want de meesten loopt noar de slager en `t vegentarische spul wordt volgens mien ok neet met de bakfietse e brach?

Al met al volgens mien een verhaal um wear 'n ambacht oet te roeien. De winkelstroaten bunt al bienoa leug en dan krig `n mooi ambacht as de slager `n drei um de oarne.

Wij et wal vleis, moar volgens mien is `n koo vegetarisch; den vret alleenig moar grus of persvoor en bie `t varken en de kippe is `t al neet vulle anders. Ik heb tenminste nog nooit `n boer e zeene den karbonades of schnitzels an `t broaden was veur zien vee. Dus `t is wal vleis, moar van vegetarisch vee. Snap ie `t nog, dan snap ik `t ok. Misschien kunt de slagers doar wat moois op verzinnen? 'Vleis van vegetarische dieren, good veur oe en good veur mien!'

Zo heurde ik van de olde slager een mooi verhaal. Der stond ne kearl in ziene winkel en den was onwies an `t zeuren. Een kilo speklappen wol e, moar neet te vet en neet te mager, moar der precies tussenin. Ok wol he ne worste, moar neet te grof, neet te fien, moar der precies tussenin.

En zo ging dat nog 10 minuten vedan, woarop den slager zeg: kom eens efkes achter de teunbanke. De klant kik hum an en zeg: wat mot ik doar dan? Zeg de slager: Noa, ik zal oe neet schuppen veur `t rechterbeen en neet veur `t linkerbeen, moar der precies tussenin!

Meer berichten