Foto: Majorie Nijbroek

Fratsen Marcel Stroet: Rooie wien tegen 't huul'n

  Column

Uien snieden is vaake `n verdreetig wark. Ne keare kwam ik thoes en toen stond de vrouwe te huul`n an `t aanrech. Ik vroag meteen: wat is der loos? Niks, zeg ze, ik bun an `t uien snien.

Um dat huul`n te veurkommen bunt der allerlei foefjes bedach:`n knuppe in den zakdook zol helpen, ne brille opzetten, hanske andoon, de uien onder water snien en goa zo moar vedan.

Moar noe kump `t: rooie wien zol ok helpen tegen `t huul`n. Ie nemt dan de mond vol rooie wien en goat dan snien.

Ik von dat `n fantastische tip, dus de earste beste keare dat ik uiensoep mos maken, bun ik ears de kelder in e loop`n um ne flesse wien te pakken. Ne slok wien in de mond en an `t snieden. Met dat ik de earste ui wil snieden, kump der iemand binnenlopen met de vroage: bun ie uien an `t snieden? Ik sloek de wien deur en zeg: joa. Wear `n slok wien en wieter snieden, krieg ik de vroage: drink ie doar wien bie midden op de dag? Ik sloek de wien wear deur en zeg: joa, want dan goat oe ogen neet treunen. Ik nem wear `n slok wien en goa wear vedan. Krieg ik de vroage of het ok warkelijk helpt. Ik sloek de wien wear deur en zeg: dat wet ik nog neet, want as ie mien steeds ne vroage stelt, mot ik sloeken en kan ik neet snieden. Opnieuw nem ik ne slok rooie wien en snie vedan.

Mien visite blef nog efkes stoan kieken en zeg: ik kwam eigenlijk den grondboor lenen. Kan dat? Ik sloek de wien wear deur en zeg: dat is prima. Pak hum moar oet de schuure. Wear nem ik `n slok wien en snie wear vedan. Ik veul`n mien al wal wat losser in `t heuf, geet de duere los en heur ik: ik heb de grondboor e vonden en breng hum morgen wal wear terugge. Ik sloek de wien deur en zeg: prima, tot morgen. Wil ik wear ne slok rooie wien nemmen is de flesse leug.

Dus met alle kunsten wet ik neet of `t helpt, want de vrouwe zoog mien an `t aanrech zwalken met `n groot mes in de hande en zeg; wat maak ie dan? Ne hele flesse wien opzoepen onder `t kokken? Ik wol nog wat zeggen, moar bun moar in berre goan liggen. Of 't helpt tegen `t huul`n wet ik nog neet moar, ie kunt der wal hearlijk op sloapen.

Meer berichten