Foto: Majorie Nijbroek

Column Marcel Stroet: Raad van elf

  Column

Ok onze gemeente meent dat jongeren mot kunnen metdoon in de gemeente en ze hebt beloofd doar ok noar te luusteren. Deurum is der noe ok een jongerenroad e kommen. Zo kunt de jongeren angeven wat de jongeren belangriek vindt. De olde gemeenteknarren kunt der dan wat met doon of neet. Ze hebt namelijk gin stemrech en hebt zichzelf an e meld. Toevallig hebt der zich elf op e geaven en dan proat ie in disse carnavalstied al raps oaver de road van elf.

Op `t gemeentehoes is het ok vake carnaval met prins Joost veurop in de polonaise. Joost is een echte carnavalskearl den ok graag in de optocht met dut, wet ie nog van veurig joar? Ok is he zomoar te porren veur een buut in de tonne. De jongeren zult der nog van op kieken wat den man allemoale teglieke kan. Ik wens de jongeren vulle starkte en wiesheid en zurg derveur dat ie oe zegje doot, want iedereene in de road heurt wal good, moar luustert slech.

Elke carnavalsvereniging hef ok `n road van elf. `t is altied een bont gezelschap dat oaveral met de Prins carnaval met geet. An `t ende van de oavond heurt ze dan eigenlijk te zurgen dat de Prins wear heel thoeskump, moar de meesten hebt dan al meuite zat um zelf heel thoes te kommen. Ik heb `t ok met meugen maken, dus ik wet dat dat heel gezellig is.

Zo was der ok ne keare `n roadslid 's oavond zien steek kwiet e wodden. Doar kwam he smorgens an met de kale bakkes. Een spul had he dervan dat e den steek kwiet was. Der vroog der eene: woar heb ie hum `t leste e zeene? Noa, zeg he, ik had hum op den tap e leg noast `n glas bier. Met zien allen werd der duftig e zoch. Veur den tap, achter den tap, onder den tap, nargens was e te vinden. Plots kump `t roadslid de zaale inlopen met de steek op, dus ieder zuchten van opluchting. Zeg der iemand: weurum zeg ie neet dat ie hum wear evonden hebt? Het roadslid kek hum an en zeg: joa, de steek had ik meteen al e vonden achter den tap, moar dat glas bier wat der noast stond kan ik nargens mear vinden.

Meer berichten