Foto: Majorie Nijbroek

Fratsen Marcel Stroet: 'In mekeare sloan'

  Column

O, wat was dat kearltje hels as `n jachthond en wat trok e van lear. Joa, onze eigen premier Rutte. Het ging allemoale oaver oldejoarsnach wear werden der hulpverleners en politie lastig e vollen deur umstanders. Rutte neumde het ne keare bie naam: he wol ze allemoale in mekeare sloan en zei letterlijk dat `t klootzakken bunt, dee dat doot. Kloare taal, want wie haalt `t zich in de kop dat as der ne ambulance veur kump rieden um iemand te redden um dan de broeders lastig te vallen of nog arger an te vallen? Wij bunt met zien allen te ruw e wodden, ontzag is der schienboar neet mear. De oaverheid is doar mede schold an duch mien. Ontzag en respect mot ie kweken en oetdreagen. Vrogger was `t hoofd van de schoole `n persoonlijkheid, noe neumt ze hum bie de veurnaam. Ok de hoesarts werd e zeene as een bepaalde hoogheid, noe lup he veuran in de polonaise. De notaris zat ie de pette veur of, noe sprek ie hum an met Harry.

Misschien mot de dienstplicht wal wear terugge kommen of iets in die geest. Efkes `n joar van thoes onder `n strak regiem, luustern of anders krieg ie ne pompeare.

Noe is der ok wear ne breef e kommen oet Nashville den groot`n ophef veroorzaakt. Zelfs burgervader Joost hef der `n mening oaver. Noe heb ik een goeien kennis Fred, den ok homo is. Volgens mien is doar niks mis met, het is `n vrolijke kearl woar ie 's oavonds good schik met kunt hemmen. He dut zien dinge net as ieder ander.

Op ne oavond hadde wij ne keare vergadering in `n looze. An `t ende ging ieder deur de veurdeure noar boeten, alleen Fred neet. Wij stoat nog efkes te lollen met mekeare tot der eene zeg: woar is Fred e bleaven? Plots kump Fred van achter 't hoes deran fietsen. Ik schreeuw zo noar hum: Potdimme, ie komt van de verkearde kante! Lachend schreeuwen he terugge: ik kom altied van de verkearde kante!

Meer berichten