Foto: Majorie Nijbroek

Column Marcel Stroet: 'Terwijl kabinet op karsreces ging, konden de winkeliers an 't wark'

  Column

Allerearst natuurlijk allemoale een heel bes nieuw joar! Loat wij der met mekeare wat moois van maken. Het begin is in ieder geval alwear neet bes veur de knippe. Alle belastingen van 6% goat umhooge noar 9%. Heel fijn wear bedach deur de oaverheid en veural dat ze dat zo laate hebt beslist. Alle prieze mossen hierdeur an e past wodden. Terwijl `t kabinet op karsreces ging, konden de kleine winkeliers allemoale an `t wark um de prieskaartjes an te passen. Makkelijk is dat, deurdat hun schienboar argens geld tekort komt, worre wij allemoale de dupe. Ze hebt dat ok wear net veur de feestdaage beslotten, want dan hebt de leu de kop argens anders bie.

Allenig vanoet de groente- en fruitwereld kwam wat commentaar en doar werd duudelijk neet noar e luusterd. Argens anders goat de lasten umleage is ons e zeg. Noe mot wij zelf moar zeen woar dat dan is. De politiek, `t is en blif `n wondere wereld. Het warkt wal makkelijk natuurlijk as ie oe geld wal kriegt of ie noe dom of slim doot.

ProRail is doar ok `n good veurbeeld van. Grond weggeven en later duur wear terugge kopen. Ik wet zeker dat doar gin mensse iets oet eigen tesse hoof te betalen, want dan was `t nooit veur e vollen. As ie dan gin kater heb van oldejoarsdag, dan krieg ie der asnog eene.

Zo bunt der ok wear heupe met goeie veurnemmens an `t joar begonnen. Ik sprak nieuwjoarsdag ok nog ne bekenden, den zich ok van alles had veur e nommen. Minder etten, mear beweagen, oetscheien met roken en op tied noar berre. He zat zo bie ons an de kökentoafel te preaken en ie zollen hum hoaste geleuven.

Toen ik hum vroog of he nog `n gleazke voezel wol, zei he: joazeker en ok van de blukske keaze nam he duftig. Ik zeg: ik dach dat ie `t wat minder wollen maken? Joazeker, zeg he, moar disse moand kump der nog niks van met al dee nieuwjoarsvisites.

Meer berichten