Foto: Majorie Nijbroek

Fratsen Marcel Stroet: doo `t hendig an met vuurwark

  Column

Net as bie zwarte piet is noe ok `t vuurwark an de beurte um as traditie op te kalifateren. Zo inens begint der zich wat an te storen en dat mut dan meteen de wereld oet. Vuurwarkvrije zones mot der kommen. Ie kunt zelfs gratis stickers kriegen die ie dan an de beume mag spiekeren um te loaten wetten van 'hier gin vuurwark'. Vaake warkt dat net de verkearde kante oet. De meesten kunt `t neet loaten um dan juust doar wat of te stekken. Wat neet mag, is spannender dan at ze oe an meudigt.

Toen ik nog zo'n kearltje was, mochte wij bie ons op de boerderieje gin vuurwark ofstekken, want dan trokken de beeste de melk op. As de olde leu dan noa de middag efkes gingen liggen, dan mos `t natuurlijk gebeuren. Met ne paar jongs oet de buurte hadde wij ne olde melkbusse oet de looze gapt en dat op `t Kooibos an. Der werd onderin `n gat e boort, luk carbid derin en wat spieje. De dekkel derop en dan `n vlemmeke bie `t gat. Kearl dat gaf ne mooien knappert. Moar allenig mossen wij iedere keare den dekkel `n ende ophalen. Plots kwam der eene met `t idee um doar een elastiek an te maken dan zol den dekkel vanzelf wear terugge kommen. Stom natuurlijk moar `t mos gebeuren. Der werden wat olde binnenbende an mekeare e knupt an den dekkel. Ik zee nog zo dat der eene de vlamme derbie heel en doar vloog den dekkel hen, moar met dat wij kiekt, kwam de dekkel ok alwear terugge, gelukkig kwam he tegen `n rasterpoal an, want as iemand hum veur de kop had e kreggen was `t nooit good of e lopen. De gein van `t carbid scheten was der bie ons allen meteen en veurgood of. Zo gebeurt `t vaake in `t leaven en gelukkig geet `t meestal good.

Op oldejoarsdag was `t ok traditie um op jacht te goan. Ne keare ston der ne jager op den hook van `t bos te posten. He had niks in de gaten, dus ik dach: ik stek efkes `n vuurpijltje of. Noe wil `t geval dat den vuurpijl precies bie dan jager in de tesse terechte kwam. Ik heb nog nooit iemand zo rap de jas oet zeen doon en helg dat he was. Het blik dat den vuurpijl net in de tesse met patronen terechte was e kommen.

Wens ik oe allen een heel good nieuwjoar en doo `t hendig an met vuurwark.

Meer berichten