Foto: Majorie Nijbroek

Fratsen Marcel Stroet: Ander etiket

  Column

Met kasmissen mot wij zurgen veur een royale dis. As ie al dee reclames zeet en wat der allemoale near wor e zat, dan meugt wij wal vief kasdaage hemmen um `t allemoale op te kriegen. Ik las zelfs dat ie in wat restaurants `t kasmenu kunt veurpreuven. Ie kriegt dan van alle menu's `n klein betje en dan kun ie oe keuze maken as `t zowiet is.

Ooit bun ik ok eens ne keare oet etten e wes met kasmissen. De toafel was prachtig e dekt met mear dan genog gereedschap. Vief vorken,dree leppels en twee messe. De kunst is um oet te vinden wat ie woar veur mot gebroeken. Noe blik dat ie van boeten noar binnen mot warken, dus earst `t kleine bestek. Bie `t veurafje had ik de vorke neet neudig; dat kon net op de pink liggen. Ok de rest van alles zoog der prachtig oet, alleen `n betje karig allemoale. Ne mooie serveerster lei oet wat der allemoale op toafel ston. Gebakken kalfslever op een bedje van gemixte sla. Ik kiek zo noar `t gebeuren en zei: noa, as ie ok zo weinig lakens op berre hebt dan wat der op `t bedje van sla ligt, dan mag ie wal `n dikken pyama antrekken.

Een endje wieter zat ne groot`n kwal van e kearl, ie kent ze wal: dee die hele tied `t hoogste woord hebt en net zo hard proat dat ie `t precies kunt verstoan an de andere toafels. He mos de wien veurpreuven, met een ernstig gezichte leet he de wien deur ziene bolle wangen rollen. Plots zegge: nee, dat is neet wat ik zeuk, hij is een beetje te droog. Efkes later komp ze wear met ne andere flesse en `t zelfde ging wear an en wear was `t neet good, disse kear vond he hum te wrange. Vief flessen wieter klonk der gejuich. Ja, dat was de goeie wien en ieder mos `t heuren.

Ik zeg later tegen de ober den ik good ken, potverdimme wat een eeuwige zeurzak um die wien. De ober begon te lachen en zei en he is ok veural gin wienkenner. He hef vief kear de zelfde wien e preuft, ik had der alleenig `n ander etiket op e plakt.

Wens ik oe allen fijne kasdaage en doo `t hendig an.

Meer berichten