Foto: Majorie Nijbroek

Column Marcel Stroet: Olde gedachten

  Column

Nostalagie neumt ze dat met `n mooi woord, as ie terugge kiekt noar vrogger. In disse donkere tied van `t joar probear e wij het met zien allen wat aangenamer te maken. Um `t donker te vedrieven wordt der oaveral karsverlichting op e hangen. Umdat `t 's oavonds nog wal eens vernemsig kold kan wean is `n gleaske kruudenbitter neet verkeard. Moar as ie zeet hoe wat leu de verlichting derbie heb hangen, dan heb ze volgens mien wal heel vulle in e nommen. Ik vin `t altied prachtig um dan efkes rond te lopen um te kieken wat oeleu dervan e maakt hebt.

Het mooiste bunt dee verlichte slingers woarbie `t neet helemoale oetkump noar `t stopcontact. Den slinger is dan mooi rond of in stervorm op e hangen en dan löp der nog een stuk verlichting langs thoes hen noar het stopcontact. Onderhand wet ik zowat woar ieder `n stopcontact hef zitten.

Ok de karsbeume wurdt allange neet mear zo netjes versierd as vrogger. De meesten heb ne slierte verlichting den ze der van een afstand heb in e smetten. Oh, `t hangt,`t hangt! De stekker in `t stopcontact en kloar is Kees. Onbrekboare ballen in de boom en wat slierten en dan good vake tegen mekeare zeggen: O wat mooi, want as ie dat moar vake genog zeg, goa ie `t zelf geleuven. Ik mot dan denken an den karsboom bie ons thoes. Wij gingen dan bie de Leostichting `t Fratersbos in en jatten doar `n mooien karsboom. Wij zagen dat neet as jatten want der stonden der zat. Zo werd dat ok oeteleg: deurdat wij der eene weghaal`n, kreggen de anderen mear ruumte, dus `t was verantwoord bosbeheer. Vroag moar an de kearls van Menkhorst.

Ok hadde wij an `t begin echte kearsen in den boom stoan zoas dat heurt, allemoale keurig recht optende. Totdat de kribbe ne keare vlam vatten, gelukkig zat der èène bie anders was `t hele hoes der met e goane. Het dak en de zietkante van de kribbe was al kats zwart e wodden. Het joar derop kreggen wij ok lempkes in de boom en nog wear later kwam der zelfs `n kunstboom. Toch is dat neet zo `t wean mot, dee loch van `n echte karsboom in hoes dat heurt toch bie miene karsgedachte. Ok bie oe…toch??

Meer berichten