Column Marcel Stroet: Blad plukk'n

  Column

Woar de gemeente zich al neet drok um mek. Noe is `t Hans Pelle oet Eibargen wear in de kop e schotten. Den man vundt dat de bladkorven vot mot. Het blad mot in de natuur zelf wegrotten veur een juiste biodiversiteit. De gemeente hef doar duftig geld in e pompt. Denk moar an de speciale vrachtwagen met kraan en alle korven dee ze her en der heb e plaatst en dan vundt Hans dat dat neet mear heurt. Noe hef Hans waarschijnlijk neet vulle beume umme thoes stoan of he hef ze allange ummekapt um van `t blad of te wean. Want meestal is `t zo dat degene dee argens las van hef het vrogger zelf `t meeste e doane hef. Is dat wieze taal of neet?

Ik wet de wieze oetspraak nog van de olde veearts oet Nee. He zei altied: beume vind ik prachtig, moar dan mot ze wal in `t bos stoan. Den man had ok `n groot'n tuin en was de hele harfst met `t blad an `t gengelen. Dat dee he in grote toetens en kiepen `t umme in `t bos.

Noe zul ie mien misschien neet geleuven, moar `t volgende is earlijk gebeurd. Ik fietste op hoes an in de noamiddag en zag `n old menneke blad oet de beume trekken veur in zien hof. Doar mos ik mear van wetten, dus ik vroag hum: wat bun ie dan an `t doon? He kik mien an en zeg: ach bakker al dat blad dat op de grond valt in `t noajoar probear ik veur te wean, deur `t veurtied derof te trekken, want bukken op mien leaftied geet neet mear zo hendig.

Zo ken ik ok zon kearltje dat vrogger elken dag wal ne flesse voezel achteroaver drukken. Noe steet he dreuge, zoas dat heet en op ieder feestje krieg ie van hum te heuren dat he neet mear drunk. As ik der lange noast stoa, is mienen dos ok wal oaver. Dan is der ok vaake wal iemand an `t massen wat he allemaal neet mag van den dokter. Ik was ne keare bie een goeien kennis ansprekken. He had net een zaakje umleidingen e had en was wear redelijk te passe, dus ik zeg: mooi um oe zo te zean. Joa, joa, zeg he, moar ik mag zowat niks mear van 'n dokter. Ik zeg: potdimme, dan krieg ie toch wal een heel ander leaven? Zeg he: Joa, moar gelukkig bun ik der nog en as der eene van doezend wekke veurbie kump dan denk ik neet an den dokter...

Meer berichten




Shopbox