Foto: Majorie Nijbroek

Column Marcel Stroet: Lech

  Column

Ie hebt ze ok vast wal zeen rieden, al dee busjes met Geas derop. Heel biezonder den naam is vast verzonnen onder `t genot van enkele biertjes. Earder in `t cafe zat der ok altied eene an 'n tap, den wol dan `n gelas bier, hoe later op den oavond hoe langer het geeeelas werd. Ik dach earst dat der een nieuw soort van brandstof was oet e vonden: geas.

Ie heurt tegenweurdig zovulle gekke dinge. Noe is Geas een groot energiebedrief, dat zowal elektra as gas dut. Wij kreggen afgelopen wekke ok 'n nieuwe gasmeter. Dat vind ik wal een heel biezonder iets. Wij mot allemoale van `t gas of en dan krieg ie ne spiksplitternieuwe meter gratis e plaatst. De monteur zei zelfs dat 't 'n slimme meter was. Ik zeg zo: wat heb ik doar an as wij van `t gas of mot? De monteur zei: dat zal nog wal loslopen, as `t al deurgeet.

Ik wet wal van al dee bijzondere kunsten met den stroom en gas snapt de meesten niks mear. Dan mot der zonnepanelen op dak, dan `n windmölle in de tuin en noe hebt ze `t alwear oaver kernenergie. Wat `n gemas, iedereene is wear duudelijk de weg kwiet.

Zol de tied nog wearkommen dat wij 's oavonds met de kippen op stok goat. Goedkoper kan `t natuurlijk neet: as `t donker wordt noar `t nus hen. Bie ons in de buurte leepen vrogger geregeld Jehova`s rond te gengelen en zo klopten ze ok ne keare an bie `n eumke den op zichzelf woonde in Hupsel. Der kwam al nooit vulle volk bie `t eumke, dus den was zear blie met proatvolk. De Jehova`s vonden dat prachtig en probearden hum oaver te halen um ok bie de club te kommen.

Ne dag later stonden ze alwear veur de deure en `t eumke heurden alles nog eens an. Met `t weggoan zeg een van de Jehova`s as ie bie ons komp dan krieg ie `t lech van Christus. Het eumke zei: moar dat is prachtig! Ik krieg `t lech van Christus?

Joa, joa, `t lech van Christus. Sluut mien meteen moar an, dan bun ik tenminste ok van dee dure stroomrekkingen of. Op de valreepe heurde ik in `t nieuws dat der `n nieuwe protestgroep is op e richt: Black Friday is discriminatie. Zal wal te maken hebben met dee andere zeurpieten.

Meer berichten




Shopbox