Foto: Majorie Nijbroek

Column Marcel Stroet: Bonen-Gait

  Column

Vrogger, eigenlijk is dat nog ens neet zo lange geleden, wazzen de culinaire hoogstandjes lange neet zo as noe. Noe kun ie de televisie hoast neet anzetten of der zit wal iemand in `n panne te reuren. Oetgebreide oetleg krieg ie derbie met van allerlei kruuden dee gin mense in hoes hef. Zal wal kommen deurdat wij tegenwoordig minder zwoar wark hebt dan toendertied. Schroevendreiers en hamers bunt vervangen deur accuboors, zekke van vieftug kilo weagt noe viefentwintig kilo. De meesten komt soavnds neet afgepeigerd mear van `t wark, der is nog energie zat um te goan sporten of wat dan ok.

Vrogger wazzen de leu meu en hadden gruwelijke smach noa `n dag in de boetenloch. Wat ducht oe van stamppot moos met `n kuultje vette jus en gekokte spek met ne bolle worste? As ie dat achter oe hadden e warkt dan hooven ie gin energiedrankje mear. De vrouwleu op de boerderieje die meastal metwarkten hadden gin tied veur allerlei aparte kokfratsen. Stamppot was makkelijk en gauw te maken.

Bie ons in `t Reurlse brook woonde een klein boertje den as bienaam had Bonen-Gait. Gait ziene vrouwe was `n bes mense, moar kokken kon ze neet. De hele winter stond der bonenstamppot op toafel. In `t noajoar hadden ze alle bonen zonder ze te duppen in e wekt. Het recept van de stamppot was simpel: ne kilo eardappel en ne kilo bonen, driete gaar kokken en deur mekeare hen hakselen, ne kladde melk der bie en wat zalt en kloar was de bonenstamppot. Het was warkelijk neet te etten. De slierten van de bonen gingen oe achter in `t gehemelte zitten en doar hadde ie nog dagenlang wille van.

Ne keare was Bonen-Gait `t zat en zei: bonenstamppot iederen dag moar wear, ik wil wal eens ne keare bonensoep. De vrouwe bedach zich niks en leep met de panne noar de pompe en slaterden der luk grondwater bie, met ne groot`n sleef reur`n ze de bonenstampot deurmekeare en zat de panne op toafel. Zo zeg ze: et smakelijk, bonensoep, eens ne keare wat anders!

Meer berichten