Foto: Majorie Nijbroek

Column Marcel Stroet: Geale kaart

  Column

Noa alle onzin van diverse wearcodes (ie kent ze wal: code geal veur zunnig wear, code oranje dat `t Nederlands elftal mot voetballen of code rood dat de rode duuvels de weide ingoat) geet de politiek ok met gekleurde kaarten smieten. Zo hef zorgminister Bruins `n geale kaarte e kreggen, umdat der twee zeekenhuuze failliet bunt e goane. Dus wij hooft der moar op te wachten of binnenkort kriegt ok alle wetholders en de burgemeister hier of doar `n gele kaarte veur. Misschien wal ne rooie kaarte.

Um de andacht af te leiden is der noe `n jongerroad op e richt in Berkelland. Zo dut ons college net of ze noar iedereene luustert. Ze heurt met zien allen wal good, moar ze luustert slech.

Um efkes terugge te kommen op de zeekenhuuze dee failliet bunt e goane; dat is toch wal heel apart nieuws. Ik zee `t al gebeuren, lig ie op de operatietoafel heb ze oe net `n betje los e sneene, kump der eene achter deure hen en zeg: ja, stop der mor met wij bunt failliet.

Zo lag ik ok ne keare in `t zeekenhoes in Grolle. Noas mien lag ne frater den net wakker was e wodden noa `n operatie an `t been. He was helemoale van de wereld of e wes.

Umdat alles stille had e leagen mossen ziene darme en bloaze wear op gang kommen. Noe wol ziene waterleiding neet mear op gang kommen. Noas mien zat ne wasbak en de zuster leet de kraane heel zachtjes druppelen. Het heelp prima veur mien, ik mos zowat meteen noar de wc, moar den frater kreeg de boel neet an `t lopen. Piene dat he had en de kraane druppelen moar deur. Ze gaven hum een hoop water te drinken, moar niks heelp.

Op `t leste kwam den dokter derbie en den brach een slengeske in en dat gaf verlichtenis. Den frater kreunen en steunen van genot. He danken de Heer noatied oetbundig, dat he wear pissen kon en ik heb de Heer bedankt dat ik de kraane oet kon zetten, zodat ik neet mear steurig hen pissen mos.

Meer berichten




Shopbox