Foto: Majorie Nijbroek

Mist

  Column

In dissen tied van `t joar met al `t blad kan `t smargens nogal eens glad en mistig wean. Dat is geveurlijk wark.Zo was ik ne keare onderweg noar Beltrum en in dichte mist haal`n mien zomoar een onman in. Ik dach: `t zal toch neet wean dat allenig miene roeten beslagen bunt, ik dreien `t raampke los en zach gin hand veur ogen, zo mistig en dan toch nog inhalen. Ja leu, der bunt der wat dee zeet nargens gin gevoar in, moar `t argste is ze slept een ander ok vaak met in de narigheid.

Zo vertellen `n kennis van mien wat hum was oaverkommen in dichte mist. Het was zo mistig dat ie zowat op de mistbanken konden zitten. Dan is `t altied prettig um achter iemand an te rieden, ie hoof dan allenig de rooie achterlichten te volgen. Mien kennis tuffen zo ok hearlijk rustig achter twee rooie lampkes an. Plots ging den man veur hum op de remme stoan en mien kennis knalden der achterop. 'Potdimme', dach he 'wat is dat noe veur een onverwachts stille goan stoan'. Mien kennis dreien `t raamke los en zei: 'Hij ie doar bun ie noe helemoal gek e wodden um zo moar te stoppen?' Den anderen man kwam oet den auto en kik mien kennis heel eigenaardig an en zeg: 'Noa ie verdamden bumpenklever mag ik misschien mien eigen auto in mien eigen garage zetten.'

Een ander soort mist is dat ze oe mist of misschien wal neet mist. Zo kwam ik onlangs de pastoor tegen en maak`n ik der efkes een preutje met. Joa de karke mist vulle inkomsten deur leu dee neet mear noar de misse goat. De pastoor klaag`n zien beste en ik zei: 'Misschien in plaats van een hostie een tostie um `t antrekkelijker te maken?' 'Noa', zeg de pastoor 'as ie earst moar eens zo in de karke komp zol mien al een hoop weard wean, want afgelopen zondag heb ik jou ok al gemist.'

Meer berichten




Shopbox