Foto: Majorie Nijbroek

Marcel Stroet: 'Met de trein reizen doo ik al joaren neet mear'

  Column

Gedoo oaver Koning Willem en Maxima met al `t geleut oaver `t milieu vundt menigeen dat dee ok hun verantwoording mot afleggen en ok mot denken an `t milieu. Ondertussen kroept ze allemoal in `t vleagtuug um moar zo snel meugelijk argens te kommen. Trouwens alle beleidsmakers doot dat. Zeggen dat wij `t neet mag, moar 't zelf wal doon. Dat is joa net as ie hen plassen goat met de hande op de rugge. Het blik zelfs dat `t Koninklijk hoes een eigen trein hef. Wis ie dat?

Noe gebroekt ze dat ding zo weinig dat de NS der zo noe en dan een endje met geet veuren, want anders zol he vaste an de rails roesten. Het ding is schienboar ok nogal luxe in orde. Een zitkamer, een badkamer en natuurlijk een barretje. Koningin Juliana gebroeken hum nog geregeld um op wintersport te goan, moar noe steet dat doar moar te stoan.

Het blik dat onze Koninklijke familie wal eens de gewone trein gebroekt, net as ie en ikke. Ik geleuf der gin zak van. Ik zee mien al in Reurle op `t station stoan en hun stoat der ok. Ie goat dan met mekeare an de proat en Willem zal zeggen: 'Foi, foi, den trein hef ok wear vertraging.' Woarop ie dan zeg: 'Maor ik denk wal dat he zo kump.' 'Denk ie dat?', zal Willem vroag'n. 'Joa, want de rails ligt der al', kan dan oe antwoord wean.

Ik denk dat Maxima der wal um kan lachen. Met de trein reizen doo ik al joaren neet mear. De leste kearen bunt mien slecht bevallen. Ik kan der neet mear oet wies worden. Vrogger zat der iemand op `t station en den verkoch oe de kaartjes, noe mot ie alles intoetsen op zo'n groot digibord. Der komp allerlei vroagen veurbie en dan wet ik al ens neet mear woar ik hen wol.

Ne keare zat ik in de trein en tegenoaver mien ging een jong menneke zitten. He had de bokse an alle kanten kapot. Ik zeg zo: 'Foi, wat bun ie dan te passe e kommen?' He kik mien an en zeg: 'Waar bemoei jij jou mee, ouwe.' Bie `t oetstappen wol he nog efkes veurkroepen. Ik kon `t neet loaten en gaf hum `n zetje. He kladden op de grond en keek mien verbaasd an. Ik zeg: 'Noe wet ik weurumme as ie al dee geate in de bokse hebt. As ie zó oetstapt...'

Meer berichten




Shopbox