Logo berkelnieuws.nl


Foto: Majorie Nijbroek

Fratsen Marcel Stroet - Hundepaspoort

  Column

Spul is `t toch wear. Noe hebt der wat bedach dat ok de hunde `n paspoort mot hemmen. Onlangs is der een hulpdienst in `t leaven e roopen, dee kunt de verwarde mensenlijn bellen. Ik denk dat die `t heel drok kriegt. Paspoort veur de hond? Mot dat beest dat zelf bie zich hemmen? As den hond dan an e hollen wurdt deur een boa, want dee goat dat vast wear controlearen, mot den hond dan effen in zien noszak veulen en loaten zeen dat he een hond is? Of mot de eigenaar dat dinge in den tuk hemmen?

De boa of wie dan ok holt oe stoande met de vroage: kun ie oe identificeren en Vicky ok? Tjonge, jonge, jonge, wat een spul. Mot ie dan de verwarde telefoonlijn bellen veur den boa of veur oezelf of de hond?

Noe kunne wij der natuurlijk op wochten dat hiernoa ok de katten, parkieten en kniene `n paspoort mot hemmen. As ie noe neet bes wet hoe ie snel rieke mot worden, ik zol zeggen: wordt pasfotofotograaf! Der bunt mear dieren as leu in `t land, dus dat mot `n goldmiene worden. De beeste mag neet lachen en mot met minstens één oor op de foto.

Ie zeet ze toch ok iederen oavond sleppen met de hunde. Een schep en een poepzak in de hande en doar geet `t hen. Ze goat met `n leuge zak en komt met een vollen wear. Leu die dan in de warre bunt, goat met `n vollen hen en komp thoes met 'n leuge zak. Noe haal ik dinge deur mekeare.

Zo ging Gait iederen oavond klokslag tiene hen wandelen met de hond. Noar het idee van ziene vrouwe duurden dat wandelen steeds langer. Gait zei dan: Joa, den hond leep der mien vandeur. De vrouwe vertrouwen `t neet en leep hum ne keare noa. Toen zag ze dat he met ne andere vrouwe leep te smoezen. Thoes kreg Gait wat deur de beene en ziene vrouwe zei: wat mot ie met dat andere wief? Gait kek verbaasd ziene vrouwe an en zeg: ik heb neet wat met dee vrouwe, moar de hunde kunt `t zo good vinden met mekeare.

Meer berichten




Shopbox