Logo berkelnieuws.nl


Foto: Majorie Nijbroek

Fratsen Marcel Stroet: Theaterdokter

  Column

De hoesartsenpraktijk in Eibargen geet noar theater 't Spieker. Op `t podium met live publiek wurdt ie dan onderzoch, op de achtergrond heur ie dan livemuziek van een strijkje. Bie een goeie oetslag begunt dan ieder te klappen en bie `n wat naarder berich komp de zakdeuke oet de tes.

Zo zal `t vast neet goan, al kunt die dokters soms wal heel raar proaten. Zo vertelden ze oaver eerstelijns zorg en tweedelijns zorg en hun verzonnen doar nuldelijnszorg bie. Het kwam der op near dat ie dus eigenlijk neet noar den dokter hen mot goan. Ie mot oezelf better vermaken of better maken. Actief wean, oaveral an met doon, mear lachen en ouwehoeren, dat is `t halve wark um good gezond te blieven. Deurum zal der vast straks in de sprekkamer `n komiek zitten, den oe zo an `t lachen mek, dat ie verget woarveur ie bie de dokter wazzen.

Gelukkig kwam de dokter neet vaake bie ons an hoes, moar as he kwam, dan dee mien va zelfs de beste bokse an. Onzen hoesarts kwam dan an berre stoan en stok oe zon ijscoshöltje in de mond. Vake dacht ik, ik wol dat ik de zoon was van den hoesarts, want iemand mot toch dee ijsjes van `t stökske opetten?

He dee zien luusterapparaat in de oarne en kek dan heel ernstig op zien horloge. He moffelen dan wat in zichzelf en zei dan tegen mooder: doo den jonge moar dree kear daags een kupke suukerwater met een warme kruuke en as `t doar neet met oaver geet, kom ik wal wear an. In de gang ston mien va dan al te wochten en zei: zo is `t met e völlen? Joa, zeg de hoesarts; he kump der disse keare wal wear oaverhen.

Mien va blie en de dokter blie. Ze dronken der dan `n paar kloare borrels op met suuker en stokken ne mooie dikke sigaare op. Het kan zo een bliespel worden veur in `t theater, moar dan in plaats van suukerwater een borreltje met suuker.

Meer berichten




Shopbox