Logo berkelnieuws.nl


Foto: Majorie Nijbroek

Fratsen Marcel Stroet: 'Willy Ribbers geet noar Qatar'

  Column

Qatar is een landje in `t middenoosten an de Perzische golf. Noe zul ie misschien denken wat kan mien dat schealen, moar doar is in 2022 het WK Voetbal veur kearls. Waarschijnlijk zult onze leeuwen der wal neet hen hooven; dee bunt drokker met kapsels en tatoo`s, dan met voetballen. Moar noe heurde ik dat der ne Beltrummer is den der wal hen geet. Joa, ie wilt `t geleuven of neet, moar Willy Ribbers geet der hen.

Dat is den kearl den de velden disse zommer greun hef e hollen met dee verschrikkelijke hette. Um de zes uur ging Willy `t berre oet um de sproeiers te verzetten op de VIOS-velden. Oaveral ging `t der oaver, zelfs de televisie kwam der an te passe. Noe blik dat de sjeiks oet Qatar dat ok e heurt hebt en hum e vroagt heb um dat doar ok te goan doon.

Dus as wij dan straks `n wedstrijd zeet en wij zeet der eene deur `t beeld sleppen met slangen, dan doot wij de wave veur Willy. Prachtig toch, zulke trouwe vriewillegers? Gelukkig bunt ze der nog, want gin enkele club kan zonder dee leu. Moar `t wurdt steeds moeilijker um der an te kommen; de jeugd hef de oarne de andere kante oet stoan. De meesten wilt ens neet met oe proaten as `t niks opbrech.

Zo maakten wij ok ne keare oliebollenbeslag veur `n jongerengroep. De jongs slepten hen en wear met de emmers oliebollendeeg. An `t ende van de dag kwammen ze mien de emmers smearig terugge brengen. Ik kiek ze zo an en zei: noa kearls, dat is een barg afwas. Zeg een van dee jongs; wat schuift `t as wij oe doar bie helpt? Ik zeg: mie helpt? As ie ze neet fatsoenlijk ofwast krieg jullie der allemoale wat achter veur. Ze hebt mien an e kekken of ze in Qatar de klokken heurden luuden. Noa de afwas heb ik ze `n biertje e doane en zei: kiek dat is de beloning noa een dag sleppen veur de vereniging.

Wat is der noe lekkerder en gezelliger dan as `t kloar is efkes met mekere noa te lallen?

Meer berichten

Shopbox