Logo berkelnieuws.nl


Foto: Majorie Nijbroek

Fratsen Marcel Stroet: Sinterkloas

  Column

Sinterkloas?, zul ie noe denken `t is pas september!? Moar Sinterkloas is tegenwoordig deur allerlei toestanden der umme hen, het hele joar zowat in `t nieuws.Het gedoo um zwarte Piet doar wet wij inmiddels alles van.

Noe was der ne kearl oet Utrecht den mos disse wekke veur `t gerecht kommen, umdat he op Facebook een oproep hadde doane um Sinterkloas um zeepe te helpen, `t leefst met de intocht zodat alle kinderen `t konden zeen. De zieke geest was 37 joar en volgens mien was hee bange dat hee neet wat in den schoon zol kriegen. Hee hef dan ok afgelopen joar met de intocht vief daage vaste zetten. Noe is `t an de rechter um te oordelen wat veur straf zo iemand mot kriegen. Ik wet zekers dat dee rechters zich ok zo noe en dan onder de pette krabt en denkt: wat een zootje is `t toch. Een geldstraf hoof ie zulk soort neet te geven, want ze hebt meestal gin naegel um de konte met te krabben. Een warkstraf hef ok neet vulle nut, want as ie zovulle tied hebt um oe drok te maken um Sinterkloas, dan loop ie met `t wark ok neet veuran. Mooi zul wean as de rechter zol besloeten um een olderwetse liefstraf, bieveurbeeld tien kleppe met de staf of met de olderwetse roe.

Ondertussen is der wal wear een dure rechtzaak oet onze knippe, den nargens umme geet. Woar mot `t toch hen? Wat de eenen mooi vund, doar hef de ander las van. Kiek moar noar de riedende rechter. Hoe ze zich doar mekeare afgat. Las van `n boom, las van de schutting, las van den oprit.

Zo sprak ik lest nog een olden jonge oet miene buurte. As der e warkt mos wodden was he der nooit bie. He zal noe een joar of zestig wean, moar warken was he altied vrie e kommen. Altied hadde wat en gin mense kon hum an `t wark hemmen. Ik zeg zo: goh kearl, dat is lang eleden dat ik oe heb e zeene! Hoe geet `t der met? Noa zegge hee: etten en drinken geet prima, moar wieter altied meu, meu, meu. Hee was nog niks veranderd, zag ik wal. Zo zal `t met `t Sinterkloasgedram dit joar ok wal neet veranderen, ok al wurde wie doar zo meu van.

Meer berichten


Shopbox