Logo berkelnieuws.nl


Foto: Majorie Nijbroek

Column Marcel Stroet - Wat ne kroam

  Column

Ik schrok al bie de köppe in de krante; misbroekt bie de nonnen in Almelo. Joa in Almelo ,ik dach dat doar neet vulle soeps gebeur`n as dat de stoplichten op greun en rood springt. Moar ok in Almelo bunt dinge gebeurt met de gardienen dichte. Noe ging `t disse keare neet um intieme misbroek moar um warkmisbroek.De kinder werden hard an `t wark e zet deur de nonnen. De nonnen dat was nogal een strabant volkje. Zoas ie wet heb ik der ok joaren lange lesse van e had en geregeld kreg e wij ne klap op de oarne, met as motto: wie neet heuren wil mot moar veulen.

Noa `t leazen van de verhalen oet Almelo dacht ik, misschien kan ik doar ok nog wat met. Joarenlang misbroekt deur de nonnen oet Beltrum. Tuurlijk was dat neet fijn as ze oe eens flink um de oarne sloagen,moar `t geet mien ok te wiet um doar de commissie Deetman oaver in te lichten. Wat ik zo wet is `t met de meesten van ons wal good e kommen.De nonnen verzorgden de olde leu en zurgden ok veur leafboarheid in `t darp. Ok bie thoes vonden ze `t neet arg dat ie wear kwammen met rooie oarne , dan werd der e zeg; dat zul ie wal verdeend hemmen. Ne olden kennis bie ons had as stopwoordje; wat ne kroam, en dat zul he ok vas e zeg hemmen noa `t verhaal van de nonnen.

Onlangs was he der en had `t verhaal e leazen oaver een of andere bekendheid woar een film van rondging oaver plassex. Den besten man zat der vol van en heel moar neet op ,wat ne kroam ,wat ne kroam. Ik zeg nog joa `t zol mien ok neet blie maken as ik onder e zeikt zol worden en dat ie dat ok nog filmt ok. O zeg den man wat ne kroam ,wat ne kroam, op `t leste kwam `t hoge woord deroet. He had `t ok probeart ,de vrouwe was hard weg e loop`n, moar `t argste was nog he mos de ganse nach in `n nat berre sloapen wat ne kroam,wat ne kroam.

Reageer als eerste
Meer berichten


Shopbox