Logo berkelnieuws.nl


Foto: Majorie Nijbroek

Column Marcel Stroet - Samen douchen

  Column

Tjonge jonge jonge wat is `t toch dreuge as ie de was ophangt kun ie bie den lesten den earsten alwear afhalen. Ok in de natuur verdreugt de boel en de boer`n kunt wal huul`n. De mais steet der hoelanger hoe poeteriger bie en `t grus is amper mear greun.

Ie kunt joa zowat den moes met jongen achter in de weide zeen loop`n.Ok het waterschap hef dat natuurluk in de gaat`n en geeft dan met een heel ernstig gezichte een code af. De boer`n mag gin water mear oet de bekke pompen as de stuwe neet mear oaverlup. Ok Vitens gif allerlei tips um water te bespoar`n.

Zo las ik dat ie neet mear allenig mag douchen. Der stond goat samen onder de douche `t bespoart water en `t is gezelliger. Gezelliger??? Dat is mooi e zeg ,ligt der moar net an met wie ie onder den douche goat. Van de wekke was ik allenig thoes en wol mien eens efkes lekker afsproeien,moar ja allenig mag dat neet. Ik bun toen in onzen veurtuin goan stoan rear`n: wie wil der met mien onder den douche. Een paar jonge dearns dee langs kwammen fietsen kekken mien an en stokken den middelsten vinger op.Ne kearl bie ons in de stroate met nogal ne redelijken bierboek vroog an mien wat der loos was en zei as het neet anders is dan wil ik wal met oe onder den douche. Doar had ik dus ok wear gin zinne an en ik zei; noa ik geleuf dat ik morgen moar goa zo smearig bun ik dan ok wear neet. 1 kear in de wekke douchen is ok feitelijk mear dan genog.

Vrogger werd der wat water ekokt en in een teil e gotten en doarin ging iedereene in `t zelfde water . De sport was dan dat ie `t earste wazzen,schoon water en lekker warm. Ston ie achter in de riege dan was dat ok nog geveurlijk want mooder slemken zo noe en dan wat kokkend water bie in de teil en dan kwam der nogal eens een streulke oaver de rugge hen.Ie rear`n oe dan de kop derof woarop mooder zei: stel oe neet an doar bun ie in ieder geval brandschoone.Leu vulle plezear as ie samen onder de douche goat en neet te lange denk der umme.

Meer berichten

Shopbox