Logo berkelnieuws.nl


Foto: Majorie Nijbroek

Column Marcel Stroet - Lange gezichten

  Column

Wij wet allemoale dat as ie luk older wurdt 't der allemoale neet better op geet wodden. Met name ons lichaam verroad dan vake oe leaftied. Luk kaler, luk mear reempels of een betje een foekevel. An vulle van dee dinge kun ie iets loaten doon. Doar is dan een plastische chirug veur den oe wat strakker in `t vel kan stekken.

Noe las ik een artikel dat de meeste ongemakken komt deur de aantrekkingskracht van de earde. Zo wurdt de oarne van olde leu luk groter deur de zwoartekrach en dat kump dan deur de oorlellen woar gin butte in zit, ondanks de grotere oarne goat de meesten ok nog slechter heur`n.

Ok `t scrotum van de kearls zal luk oetzakken. Het is dan neet te hoppen dat wij ooit 130 joar wurdt, want dan zol ie oaver oe eigen gereedschap struukelen. Noe kwam ik doar zo oaver an `t prakkiseren 's oavonds met een fleske bier in de hande - hearlijk in dissen tied natuurlijk - toen ik `n vlearmoes veurbie zag vleagen. Ik had meteen de oplossing veur `t probleem van de zwoartekrach en wet noe ok weurumme dat de vlearmuze opkop hangt as ze sloapt. Dan geet de zwoartekrach andersumme warken.

Moar op de kop sloapen, dat vult nog neet met en is eigenlijk neet te doon. Zo was der ne jonge bie ons in `t darp en den kreag verkering met `n zeemansdochter. Toen ze de earste keare met mekaere noar berre hen gingen, zei de zeemansdochter: ik mot wal bekennen dat ik al twee vriendjes heb e had en ik heb op beide borsten een tattoo stoan van hun gezichte. Ze leet hum de borsten zeen en den jonge begon te lachen en te lachen; he kwam zowat neet mear bie.

Woarop de dearne zei: wat lach ie toch? Ik dach dat ie dat arg zolden vinden? Nea, nea, zeg de jonge, ik zee `t al veur mien as de zwoartekrach vat op oe krig: wat zult dee kearls dan lange gezichten kriegen!

Meer berichten


Shopbox