Logo berkelnieuws.nl


Foto: Majorie Nijbroek

Column Marcel Stroet: Een biertje bie de kapper?

  Column

Neet alle nieuws is gelukkig narigheid. Vergangen wekke zag ik dat `t binnenkort meugelijk is dat de kapper of klearwinkel ok `n wientje mag schenken. Prachtig toch? Het kump veur mien allenig vul te late. Vrogger had ik een groot`n bos hoar, moar deur de joaren hen is `t aardig oet e dunt en is der neet vulle eare mear an te behalen en dan geet de kapper `t gezellig maken. De vrouwleu doarentegen kunt uren deur brengen bie de kapper met permanenten, wassen en watergolven.

Ik zee al zo veur mien dat de kapper op zal bellen en zeggen: wil ie oe vrouwe efkes ophalen, want ze mag neet mear rieden. Ik zee mien al zitten en de kapper vrög: mot der vulle of weinig af en wat wil ie derbie drinken? Ik zeg: doo mien moar een biertje en drink der zelf ok eene met. As de kapper in de loop van de dag dan `n betje scheef knipt, is dat natuurlijk gin wonder.

Ok in ne klearwinkel zol ik mien een stuk better thoes veulen as de verkoper der an kump en zeg: kan ik u wat inschenken onder het zoeken? Met een paar glaze alcohol op kun ie vaker wal iets makkelijker kiezen. Ie zolt vast met de meest wondere creaties thoeskommen en dan zal de familie zeggen: dat lik der neet op, goa morgen moar wear terugge! Ha, denk ie dan bie oezelf: gezellig efkes wear noar de klearwinkel hen. Op de fietse natuurlijk!

Zo had ik ok `n kennis den in nogal wat besturen zat. Altied noa `t vergaderen kwammen ze in `t café terechte. Ziene vrouwe klaag'n der nogal oaver en zei: mien Harry kump dan altied 's nachts wear en dan lup he derbie of he de krulspelden nog in hef.

Proost! Tut bie de kapper!

reageer als eerste
Meer berichten


Shopbox