Logo berkelnieuws.nl


Foto: Majorie Nijbroek

Column Marcel Stroet: Standbeeld voor Willem en de kearls

  Column

Joa, de kearls van Normaal heb `t veurmekaere e kreggen: een eigen standbeeld in Hummelo. Ze hebt de Achterhook dan ok danig op de kaarte e zet. As ie oe vrogger hoaste schaam`n dat ie oet de Achterhook kwammen, veranderen dat deur Normaal in trots. As zonne westerling oe dan ansprak met 'waar kom jij vandaan?' Antwoorden ik steevast: 'Oet `t land van Normaal'.

Willem ter Horst kwam zelfs oet dezelfde plaatse as ikke, dus trotser kon ie hoste neet wean en Jan Manschot kwam oet de bakkerije! Hoe wil ie `t mooier hemmen? Willem ter Horst kwam van een klein keuterboerke en ie kekken der altied wat poeterig op. Ne keare mos ik der wean um `t karmisgeld op te haal`n en joa heur doar zat he, precies zo he was. Ne bord stampot half leug e getten met ne halve sigaare derin oet e drukt, natuurlijk ne knalpot Grolsch an de lippe en de lichters waren hum van de scholders e zakt.

Willem leaven altied een betje op de achtergrond in Beltrum. He leep neet veurop in den optocht. Ik denk dat menig plaatsgenoot hum ens neet kende veur zien Normaaltied. Moar dat veranderen natuurlijk op slag, toen he eenmoal bie Toppop was e wes. Het leek toen wal of 't hele darp dagelijks met hum umme ging. Toen hun earste nummer 'Oerend hard' een hit werd zat ik net op de bakkersschoole in Wageningen.

Ik zat doar an toafel met allemoale van dee stoepenschijters, zoas ik ze toendertied neumde. Dat waren in mien ogen de leu oet de stad dee met vulle schreeuwen altied veur an `t voarhekke stonden. Ik zat noast een jonge oet Oegstgeest den zich wal heel veurnaam veur deed. Oaveral zat he met den rebbel tussendeur te hanisssen. Op een bepaald moment heur`n he mien proaten en he zeg: hé boertje, waar hebben ze jou opgegraven. Ik dach earst nog: Zal ik hum der een stuk of wat veur de bakkes geven, moar dat was mien de ere te noa. Dus ik zeg trots: Ik kom oet Beltrum. Verbaasd kik he mien an en zeg uit Beltrum? Waar ligt dat bij in de buurt? Ik zeg: Dat ligt dicht bie Hupsel. 'O', zeg he, 'Daar! Dan weet ik wel waar je woont!' Ik dach bie mienzelf: Ojadasawa.

reageer als eerste
Meer berichten




Shopbox