Logo berkelnieuws.nl


Foto: Majorie Nijbroek

Column Marcel Stroet: 'Joa, de nieuwe racebaane is los!'

  Column

Joa, de nieuwe racebaane is los, noa 4 joar ongemak en gedoo kun ie der noe over hen scheur`n. Natuurlijk was wal te verwachten, neet iedereene is der blie met. De earste commentaren stonden alwear oetgebreid in de divarse media: De weg is te smal het had `n tweebaansweg motten wean; Der zit tevulle viaducten in en zelfs `n viaduct veur `t wild. Want stel oe veur dat den wolf den onze schoape opvret zol verongelukken!

Ok de autobranche vund `t fantastisch: ze kunt noe wear mear snelle auto`s verkopen. Ik wet dat der een hoop kearls nog gekker met hun auto bunt dan met de vrouwe. Zo was der bie ons in de buurte ne jonge den zien earsten auto had e koch, as he dan 's oavonds wear kwam van `t wark zat he den auto altied precies veur `t kamerraam. De luien stool had he dan zo near e zet dat he de hele tied noar den auto kon kieken.

Bie ons thoes kwammen ok altied vulle veehandelsleu en dee reden allemoale in `n groot`n Mercedes. `t Smoesje derachter was dat ze zonne groot`n auto hadden, umdat ze altied met zwoare anhangers reden.

Ne keare was een van dee veehandelaren in Goor bie `n grote Mercedesgarage um een nieuwen te kopen. De verkoper van `t soort 'ik heb hum zelf ok' begon een heel verhaal af te stekken wat der allemoale wal meugelik was met den auto. He blif moar oaverdrieven: 'As ie vanaf hier 's morgens um zeven uur wegjaagt bun ie um kwart oaver zeven in Almelo.' De pries werd af e proat en de veehandelaar ging op hoes an, um der nog efkes oaver noa te denken. Twee daage later belt den veehandelaar den verkoper op en zeg: ik heb der duftig oaver noa e dach, moar ik koop den auto neet. De verkoper, natuurlijk zwoar teleurgesteld, zeg: 'Mag ik dan misschien wetten weurumme neet?' Zeg den veehandelaar: 'Ik zol neet wetten wat ik iedere morgen um kwart oaver 7 in Almelo mot doon!'

reageer als eerste
Meer berichten


Shopbox