Logo berkelnieuws.nl


Foto: Majorie Nijbroek

Fratsen Marcel Stroet: Foekevel

  Column

Soms mot ie de dinge dee leu zeg neet al te letterlijk nemmen. Zo oaverkwam `t mien met `n olden bekenden. Den man zoog der nogal poeterig oet en ik zeg: zo, wat schelt deran? Noa, zeg den man ik zit neet zo lekker in mien vel. Ik zeg: hoe bedoel ie, te krap of te foekerig? He kik mien met grote ogen an en zei: nea `t zit mear tussen de oarne. Ik zeg: ja, tussen de oarne zit oe heuf en bie de meesten ok nog iets verstand. Wear kek he mien verbaasd an en he zeg: nea `t is mear dat ik altied las heb as de blader an de beume komt. Ik zeg: ik heb der mear las van as ze der af valt. Zo kun ie soms hearlijk langs mekeare hen lullen.

Wil ie op politiek nivo warken, dan krieg ie doar volgens mien zelfs een cursus in. Het is dan de kunst um een toespraak te hollen van roem een half uur zonder wat te zeggen. Binnenkort kriege wij doar wear vast een leuk staaltje van te heuren van Wethouder Marijke. Berkelland hef ne tegenvaller van 1,7 miljoen. Ik wet zekers dat Marijke dat prima geet verdedigen en dat ie op `t leste ok nog goat geleuven: `t had vulle mear kunnen wean. Marijke kan dan heel strak kieken, dan krieg ie al zowat kippevel. Wetholder Han wringt zich ondertussen in allerlei bochten um zien baantje moar te kunnen hollen. De stemmen mossen zelfs twee kear e teld wodden. Dus Han zit ok vast neet zo lekker in zien vel. Alhoewal, he krig natuurlijk wal wachtgeld.

Vrogger op schoole hadde wij ok ne nonne met ne onderkinne, dus tevulle vel. As ze ons dan ne moeilijke somme opgaf, dan zat zat zee met heur heuf noar onderen te reuren in heur eigen vel. Ze had altied `n kruuske um de nekke en den verdronk dan in dee kinne.

Ne keare was `t mense an `t reuren met de onderkinne en toen knapte `t kruus van den ketting. Het ding stuiterden op de grond precies bie mien veur de veute. Ik kon `t neet loaten en schuppen `t kruuske van mien of. He vloog precies in `t gat van de verwarmingspiepe. De nonne had dat neet e zeene en hef dagenlang e zoch noar `t kruuske. Toen ik zag dat ze doar vulle verdreet van had, heb ik `t moar op e biecht. Achterof had ik dat nooit motten doon, want ik heb toch ransel e had, neet mooi mear. As ik ze dan later zag lopen deur `t darp dan dacht ik altied nog wat een naar foekevel bun ie toch.

reageer als eerste
Meer berichten

Shopbox