Logo berkelnieuws.nl


Foto: Majorie Nijbroek

Column Marcel Stroet: Gelal

  Column

Met name in disse tied dat alle politieke partijen veural veur zich zelf promotie maakt kump der een hoop gelal los. Der wurdt wear heupe geld oet e geven um toch moar veural op dissen of geenen te goan stemmen. Disse wekke lag Han Boer bie ons op de deurmatte en ik ging met mien groot`n voot midden op zien heuf stoan. Moar ieder kent Han wal, he blef gewoon lachen.

De VVD meent dat ze in `n olle piel ende leu kunt winnen. En de rest van de partijen dut ok duftig met. Ze lolt allemoale of ze al joaren gin hemd mear an hebt. Het grootste wonder in de politiek is dat ie wat zegt wat niks in hef en dat toch heel ernstig kunt vertellen. As ie een simpele vroage stelt oaver joa of nea dan zal een good politicus dit beantwoorden met: Mijn partij kan hier noch bevestigend als ontkennend op reageren. Of as ie vroagt wat iemand der zelf van vund zal `t antwoord wean: Het is niet aan mij en zeker niet aan mijn partij om hierin nu al een mening te kunnen vormen.

Zo woonden der vrogger in Lintvelde ok `n boer den in de politiek zat. Den kearl kon lallen dat he `t op den duur zelf ging geleuven. Wij neumden hum altied gekschearend Boer Koekoek. Het was nog in de tied van burgemeister Cappetti en den boer had ons wies e maakt dat he elke moand een één op één gesprek had met de burgemeister um de toestand in de gemeente deur te nemmen. As Cappetti dan met een veurstel kwam dan was dat zien idee.

Toen `t met zien boerderieje wat minder ging, dee he der klusjes bie veur de plaatselijke supermarkt. In dee tied werden de winkelbeukske smargens altied deur hum op e haald. Met de ritse van de bokse wied los vroog he dan: is der nog iets neudig oet de winkel? Ne keare vertellen he dat e ne dag noar Soestdijk was ewes. He had doar een betje rond e gengeld en joa heur doar was mooder in den tuin an `t schoffelen. Mien va zeg: mooder? Joa zegge de koninginne zelf een heel gewoon mense, ze vroog ons der ok nog efkes in um een kupke thee te drinken. Vanf dee tied heet`n he gin boer Koeokoek mear moar Jan met de korte achternaam.

reageer als eerste
Meer berichten


Shopbox