Logo berkelnieuws.nl


Foto: Majorie Nijbroek

Column Marcel Stroet: De zwegel

  Column

Veurige wekke had ik `t oaver de otters en bevers die ik nog wal eens deur mekeare haal. Noe was ik van de wekke argens op een verjeurdagfeestje en joa heur der zat der wear zon eene. Ie kent ze wal: Ie kunt `t verhaal nog zo mooi vertellen of den wet `t better. Zoas ok Youp van `t Hek dat zo mooi kan zeggen: Dan klopt alles moar dan is der altied wal `n zwoager of eume den dan zeg: Ja, maaaarrrr?? En dan kump der een nog better idee of verhaal. Het ging een kear zelfs zowiet dat der eene al eerder wis dat der iemand `n ongeluk had e had dan `t gebeurd was. Ik heuren der eene vertellen van: Goh, heb ie dat e heurt van Gait, den is toch te passe e kommen. Den hef met den hand in de dreibanke e zetten. O, zeg den tooheurder, dat wis ik gisteren al.

De verteller kik hum an en zeg: moar `t is vanmargen pas gebeurd. Noa, zeg den tooheurder onverschrokken, moar ik had gisteren al e zeene dat dat neet good kon goan. Zo kregge wij `t ok oaver steenmarters op de visite. Der kwam mien `n verhaal van iemand den doar las van had. Het heel moar neet op. En alles wat iemand ooit had met e maakt had, had he tien kear arger met e maakt. Het kwam der hoaste op near dat den marter ne halve koo onder de dakpannen had e trokken.

Toen he endelijk oet e lult was zei mien neafke dat he `n kammeroad had den ok elken dag gemas had op `t dak. Iederen oavond was `t raak: een gedonder en gebrek boaven oaver de pannen hen. Noe blek dat `n zwegel te wean. Der veel efkes `n doodse stilte, ieder an toafel kek mekeare efkes an totdat den betterwetter vroog ne wat? O, zeg mien neafke: ne zwegel. Ne zwegel? vroogen der al mear, joa, ne zwegel. Moar wat is in vredesnaam `n zwegel dan? Noa, zeg mien neafke, dat heb ik mien kameroad ok e vroagt en ik kreg as antwoord; ie meent toch neet dat ik midden in de nacht op dak kroep um te kieken hoe `n zwegel der oet zut!

reageer als eerste
Meer berichten




Shopbox