Foto: Majorie Nijbroek

Column Marcel Stroet: Hulpverleners

  Column

Hoe haal ie `t in de kop. Dat mot ik altied denken as ik zee dat de hulpverleners lastig e vollen wurdt. Met name um de joarwisseling wurdt ze met van alles belaagd.

Dee hulpverleners komp der neet veur de gezelligheid, moar um leu in nood te helpen. As dank krieg ze `n posje klappen of een hoop vuurwark noar de kop e gooid. Doar kan ik mien helemoale niks bie veurstellen. Stel oe toch veur dat der eene op starven ligt, moar de broeders kunt der neet bie umdat d`r een stelletje gekken bunt dee ze an wilt vallen? Hoe haal ie `t in de kop um zo te doon? Grote schande, wat is dat toch veur volk en woar is `t mis e goane? Ok zee ie dan her en der iedereene wildplassen, de politie zeg der dan moar niks van, want anders bunt de rapen gaar.

Ok de politie hef het neet mear in de hand, ok dee wurdt an e vollen met vuurwark en neum moar op. Zo zatten wij ok ne keare nieuwjoar te winnen bij een paar goeie bekenden het was al wal half januari moar `t ging der nog fiks an. Het bier leep der dunne deur en ieder had goeien zin. Ok Jopie was der bie, z`on kearltje woarvan ie zollen zeggen 'he hef ze wal, moar neet allemoale op de riege'. Jopie kon unmundig innemmen zonder vulle te zeggen. He was ok altied vriegezel e bleven, want as he ne mooie dearne zag klappen he dichte. Jopie woonde nog bie zie moo in hoes en dat was moar good ok. Plots op de visite zeg Jopie: 'Ik mot effen de eardappel afgeet`n' en he slakkeren noar boeten hen. Een uur later veel ons op dat Jopie neet wear was e kommen en wij dachten: 'He zal wal slech op hoes an wean.' Het zat mien toch neet lekker, dus ik dach de dag derop ik vroag zien moo efkes. 'Och', zeg zien moo, 'den armen Jopie hef gisteren `n klap onder in de boek e had en wieter wil he der niks oaver kwiet.' Ikke noar Jopie hen en zag hum liggen spierwit in berre. Ik zeg: 'Jopie, van wie heb ie `n klap e had?' 'Och', zeg Jopie, 'ik ging ja efkes noar boeten hen miegen en toen heb ik hum oaver den stroomdroad hen e hollen, ik schrok der zo van dat ik veuroaver in den stroomdroad veel met de kleine jonge en alles dut mien zear.'

Misschien `n idee? Stromdroadjes tegen wildplassen...

reageer als eerste
Meer berichten

Shopbox