Logo berkelnieuws.nl


Foto: Majorie Nijbroek

Column Marcel Stroet: Massen en meer

  Column

Joa leu, de tied roast veurbie. Veur ie `t wet zit ie alwear achter de kalkoen an de dis. Okay, `t joarlijkse gemas met den karsboom geet wear an.`n kameroad zeg mien ieder joar wear: koop toch `n kunstboom. Noa de kasmissen `n zeil deroaver hen en met ballen en lempkes geet `t noar de zolder. Den man is alle joar met vief minuten kloar.

Zo neet ikke, ik vin dat der `n echten boom mot kommen. Het gemas heurt der `n betje bie. Ieder joar past he neet in den korf en bun ik an `t massen met de wortel. De zaage der bie en gruwelijk kolle jatten. Boeten zet ik hum in den korf, as he lieke steet kump `t argste, noar binnen hen sleppen met dat ding. An `t spoor kun ie nog daag`n lang zeen wat der gebeurd is.

Ok heb ik de boom meestal luk te hooge, dus he past neet onder `t kozien deur. De schilder is doar ieder joar wear blie met. Steet he eenmoal op de juuste plaatse dan heb ik wear `n voldoan geveul en natuurlijk dee hearlijke loch in hoes.

Veur `n paar joar terugge kwam de hoesarts langs met ne raare vroage. He was lid van een of andere club en dee verkochten kalkoenen. Een gedeelte van de opbrengst ging noar een goed doel. Ik bestellen der eene en he zol hum vlak veur de karsdaage brengen.

Een kameroad van mien zol smiddags efkes kommen um `n biertje te drinken. Zoas bekenden dat hier doot, kwam he der achter umme hen. He kwam binnen en zeg: ie krieg ok nog ander volk, ik zag de slager bie de veurdeure stoan met `n groot`n kalkoen ondern arm. Toen ik hum later zei dat dat mien hoesarts Wolf was, kek he mien an en zei: joa, joa een Wolf met een kalkoen onder den arm en den is hoesarts!? Ik zeg: joa, mooi toch, deurumme mankeart mien ok ooit wat.

reageer als eerste
Meer berichten