Logo berkelnieuws.nl


Foto: Majorie Nijbroek

Boetenlanders

  Column

Ik wet nog dat toendertied den Janmaat zei: 'Boetenlanders woar heurt die? Juust in `t boetenland!' He werd doar duftig op of e rekkend en den man ging ok te wiet
in de proat. Zo had he ok steevast iedere winter wear de kreet: 'Alle boetenlanders `t land oet veur een witte kerst.' Okay, Wilders kan der wat van met den proatzak noar de andersgekleurde mensen. Ik vin dat dan ok proat van niks en kan de boetenlanders wal lien um mien hen.

Moar `t mot natuurlijk neet te wiet goan. Dat ze hier loopt met heufddeuke vin ik helemoale niks. Der is noe zelfs `n proces ewes dat de earste politieagente `n heufddook op mag in Rotterdam. Dat geet toch te wiet? Noe bunt ze de weg kwiet. Van mien mag iedereene hier kommen wonen as ze zich moar holt an onze gebroeken.

Stel oe veur dat ie midden in de nacht an e hollen wordt deur eene met zon sjaal umme, ik zol de sukke der meteen wear in zetten. De politie heurt een veurbeeldfunctie te hemmen en doar heurt `n gepast uniform bie. Dan straal ie ontzag oet en nem ie ze serieus. Nogmoals, prima dat dee leu hier bunt, moar hol oe an onze regels en cultuur.

In mien jonge tied wazzen der nog amper boetenlanders en al helemoale neet bie ons op `t Slat. Toen de plaatselijke loonwarker met ziene knechte `n dag noar de landbouwbeurs was e wes in Amsterdam, kwammen ze altied wear met de wildste verhalen. Het ging dan neet oaver de beurs, moar wat ze allemoal zeene hadden op `t centraal station. Een van de oldere mennekes dee doar warken zei heel ernstig: 'Ik heb zelfs ne zwarten e zeene.' Het hele darp proat`n der oaver.

Ok had der bie `t spoor eene e zetten en dat had e zeg dat he Jezus was. Het olde menneke ging der met an de proat en zei: moar mien besten jonge, dat kan toch helemoale neet? De Jezusfiguur kon `t plat natuurlijk neet verstoan en zei tegen `t olde menneke: 'Ja, Jezus helpt ook de buitenlanders die verloren zijn.' De andere kearls heb hum der moar weg e trokken, anders wazzen ze noe nog an de proat ewes.

reageer als eerste
Meer berichten